Torpaqlarımızın işğaldan azad edilməsi uğrunda gedən Vətən müharibəsində qəhrəmancasına döyüşərək şəhidlik zirvəsinə ucalmış DİN Daxili Qoşunlarının hərbi qulluqçusu Sabir Əbdürrəhmanlının il mərasimi keçirilib.
Xeberle.com xəbər verir ki, Daxili İşlər Nazirliyinin Baş Cinayət Axtarışı İdarəsinin rəisi, polis general- mayoru Arzu Daşdəmirov, Sumqayıt şəhər Polis İdarəsinin rəisi, polis polkovniki Fəqan Azadəliyev və Daxili Qoşunların hərbi qulluqçuları şəhidin məzarını ziyarət edib. Şəhidin məzarı önünə əklil və çiçək dəstələri düzülüb. Azərbaycanın ərazi bütövlüyü uğrunda canından keçmiş bütün şəhidlərimizin əziz xatirəsi bir dəqiqəlik sükutla yad edilib.
Şəhidin hər bir gənc üçün örnək olan ömür yolundan, eləcə də Vətən müharibəsindəki hərbi əməliyyatlar zamanı göstərdiyi hünərdən danışılıb. Şəhidin ailə üzvləri Vətənə xidmətin hər bir övladın borcu olduğunu deyərək, övladları ilə fəxr etdiklərini, şəhid ailələrinə göstərilən diqqət və qayğıya görə ölkə rəhbərliyinə minnətdarlıqlarını bildiriblər.
Qeyd edək ki, Sabir Əbdürrəhmanlı 1998-ci il martın 9-da Sumqayıt şəhərində anadan olubAzərbaycanın Daxili İşlər Nazirliyinin Daxili Qoşunlarının çavuşu olan Sabir Əbdürrəhmanlı 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb. Sabir Əbdürrəhmanlı oktyabrın 8-də Füzuli döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.
O, Azərbaycan Respublikası Prezidentinin müvafiq sərəncamları ilə çavuş Sabir Əbdürrəhmanlı ölümündən sonra "Vətən uğrunda", "Kəlbəcərin azad olunmasına görə" , "Cəbrayılın azad olunmasına görə" və "Füzulinin azad olunmasına görə" medalları ilə təltif edilib.
Xəbərdən istifadə edərkən istinad etmək vacibdir.
