Dünya görüşü geniş, savadlı, müdrik, millətinin ona göstərdiyi inama, etibara sadiq olan Ali Baş Komandanımız İlham Əliyev və onun ətrafında bir yumruq kimi birləşən Azərbaycan əsgərinin rəşadəti sayəsində Xalqımız bu savaşı qazandı. Bu səbəbdən hər bir azərbaycanlı vətəndaş, zəfərimizin səbəbkarlarına daim minnətdar olacaqdır.
Sumqayıt Regional Mədəniyyət İdarəsinin Zəngilan rayon nümayəndəliyi İkinci Qarabağ şəhidi olan baş leytenant Həsən Vüqar oğlu Rzazadənin evini və məzarını ziyarət ediblər.
44 günlük müharibədə Prezidentimizin qətiyyətli və qüdrətli sərkərdəliyindən, dövlət-xalq-ordu birliyinin gücündən, şəhid Həsənin şərəfli döyüş yolundan danışıblar.
H. Rzazadə 15 iyun 1994-cü ildə Sumqayıt şəhərində anadan olub. Əslən Zəngilan rayonunun Mincivan qəsəbəsindən olan şəhidimiz 2001-ci ildə Qusar rayonunun Yuxarı Zeyxur kənd orta məktəbə başlayıb. 2011-2015-ci illərdə Heydər Əliyev adına Azərbaycan Ali Hərbi Məktəbində, 2015-ci ildə isə leytenant hərbi rütbəsi ilə Təlim Tədris Mərkəzində təhsilini davam etdirib. 2016-cı ildə N saylı hərbi hissədə hərbi xidmətə başlayıb. Xidmətini 2017-ci ildə Sülhməramlı qüvvələrdə tağım komandiri vəzifəsində davam etdirib. 2018-ci ildə baş leytenant hərbi rütbəsi alıb. 2019-cu ilin yanvar ayından 6 ay müddətinə Əfqanıstana ezam olunub. 27 sentyabr 2020-ci ildə torpaqlarımızın işğaldan azad edilməsi uğrunda gedən döyüşlərdə könüllü olaraq ön cəbhəyə yollanıb. Zəngilan, Qubadlı və Laçın rayonlarının işğaldan azad olunması uğrunda gedən döyüşlərdə böyük şücaət göstərib.
Oktyabrın 29-u Laçın dəhlizi uğrunda gedən döyüşlərdə Şəhidlik zirvəsinə yüksəlib. 31 oktyabr 2020-ci ildə II Şəhidlər Xiyabanında dəfn olunub. Azərbaycan Respublikası Prezidentinin müvafiq sərəncamları ilə Həsən Rzazadə (ölümündən sonra) "Qarabağ" ordeni, " Vətən uğrunda", "Cəbrayılın azad olunmasına görə", "Qubadlının azad olunmasına görə ", "Laçının azad olunmasına görə" medalları ilə təltif edilib.
Müəssisənin kollektivi şəhidin ailəsinə sovqat təqdim edib, Allahdan səbr diləyiblər.
