"Ötən gün Unibankın Səbail filialına kredit götürmək üçün müraciət etdim. Qəribə bir halla rastlaşdım. Mərkəzləşdirilmiş Kredit Reyestrinə (MKR) baxıb dedilər ki, guya mən 2010 -cu ildə hansısa bankdan 4200 manat kredit götürmüşəm və geçikmələrlə borcu ödəyirəm. 2700 manat ödənməmiş borcum qalıb.”
Bu sözləri Xeberle.com-a açıqlamasında Vəhdət Partiyasının Sumqayıt şəhər təşkilatının sədri, politoloq Vasif Əfəndi deyib. V. Əfəndi heç bir banka kredit borcunun olmadığını qeyd edib. Qarşılaşdığı problemi araşdıranda isə maraqlı faktla üzləşib: "Heç bir bankdan kredit götürməmişəm, zamin də durmamışam. Məsələni aydınlaşdırmağa çalışdım və isti izlərlə Royal Banka gəlib çıxdım və bank fırıldağının şahidi oldum. Məsələni aydınlaşdıranda bəlli oldu ki,mənə ünvanlanmış borc əslində Mehdiyeva Səbinə İldırım qızına aid imiş. Lakin təkidlə həmin xanımın ünvanını istədikdə əvvəlcə dedilər ki. guya bu xanım fırıldaqçıdır. Sonra isə dedilər ki, bəs şəxsiyyət vəsiqənizin kodu səhvən üst-üstə düşüb. Bu böyük fırıldaq və maxinasiyadır.”
Politoloq bu kimi hallarla bir çox insanların rastlaşdığını vurğulayıb. Bankların bu qanunsuzluğu isə vətəndaşlara ciddi zərbə vurur: "Hazırda çox sayda insanlar bu tələyə düşüblər. Heç bir bank əməliyyatı olmayan vətəndaşlar saxta yolla banka borclu edilirlər.Bu səbəbdən də ən azından həmin insanlar MKR siyahısına düşərək bütün bank əməliyyatlarından məhrum edilirlər”
Onun sözlərinə görə, bu özbaşınalıqdan əziyyət çəkir və heç bir bankdan pul və ya ödəmə kartı ala bilmir.
Hüquqşünas Anar Qasımlı Xeberle.com-a bildirdi ki, son vaxtlar Royal bankla baglı şikayətlərin sayı artıb: "Xeyli sayda analoji problemlərlə müraciət edənlər çoxalıb. Yaxşı olar ki, vətəndaşlar bu məsələni məhkəmə müstəvisinə çıxarsınlar. Onlara dəymiş maddi və mənəvi zərəri tələb etsinlər.”
Xatırladaq ki, "Royal Bank” müflis olub.
R.Zeynallı/Xeberle.com
Xəbərdən istifadə edərkən istinad etmək vacibdir.
