AMEA-nın Nəsimi adına Dilçilik İnstitunda unudulmaz türkoloq, ədəbi-tənqidçi, ictimai-siyasi xadim Aydın Məmmədovun anadan olmasının 70 illik yublileyi münasibətilə elmi sessiya keçirilmişdir. Mətbuat xidmətindən Xeberle.com-a verilən məlumata görə, 2 fevral günü baş tutan yubileyin 2 fevral Gənclər günündə qeyd olunması heç də təsadüfi deyil, bunda məqsəd A.Məmmədov kimi vətənpərvər alimləri gənc nəslə tanıtmaqdır. Elmi sessiyanı giriş sözü ilə açan Dilçilik İnstitutunun direktoru akademik Tofiq Hacıyev bildirib ki, bu gün biz dilçilik və mədəniyyət tarixində xüsusi çəkisi olan bir alimi yad edirik. Düzdür, o, elmlər namizədi kimi həyatdan getsə də, amma ən çox istinad olunan şəxslərdəndir. A.Məmmədov dilin fonetikasını tədqiq edən seçilən alimlərdən biridir. A.Şerbak A.Məmmədovun fonetika sahəsində olan elmi fəaliyyətini həmişə yüksək dəyərləndirmişdir. A.Məmmədov 1988-ci ildə "Kitabi-Dədə Qorqudun birinci kollokviumu”nu təşkil edərək Türkiyə ilə Azərbaycan arasında elmi-mədəni əlaqələrin güclənməsinə nail olmuşdur. "Azərbaycan filologiya məsələləri” adlı jurnalın çapı da onun adı ilə bağlıdır. Aydın Məmmədov görkəmli dilçi olmaqla yanaşı, həm də istedadlı ədəbiyyatşünas, tənqidçidir. Aydın Məmmədov AMEA-nın Rəyasət heyətində Humanitar Bölmənin elmi katibi vəzifəsində işləyərək bu sahədə çoxlu işlər görmüşdür. Həmçinin o, Nəsimi adına Dilçilik İnstitutunda Tipoloji Dilçilik şöbəsində çalışıb. AMEA-nın Nəsimi adına Dilçilik İnstitutunun aparıcı elmi işçisi, dosent Baba Məhərrəmli "Aydın Məmmədovun dilçilik görüşləri” adlı məruzəsilə çıxış etmişdir. Türkoloqun "Türk dillərində samitlər: anlaut və kombinatorika” adlı əsəri fonetika elminə sanballı töhfələrdən biridir. Professor Tofiq Məlikli Aydın Məmmədovla bağlı xatirələrini dilə gətirərək onunla olan tələbəlik dostluğundan bəhs etdi. Tərcümə Mərkəzinin aparat katibi Yaşar Əliyev alimin xalq qarşısında fəaliyyətindən bəhs edərək bildirdi ki, A.Məmmədov Azərbaycanda ilk dəfə olaraq Tərcümə Mərkəzinin yaradılmasına nail olmuşdur. Bu gün də fəaliyyətini davam etdirən həmin Tərcümə Mərkəzi A.Məmmədovun kitabının çapını hazırlayır. Professor Sevil Mehdiyeva isə vurğuladı ki, biz A.Məmmədovu qoruya bilmədiyimiz alimlərimizdən idi. Millət vəkili Sabir Rüstəmxanlı A.Məmmədovun yubileyinin daha geniş səviyyədə qeyd edilməsini vurğuladı. Lakin Dilçilik İnstitutu bu gün onu böyük sevgilə yada salır. Sonda Elmi Sessiya öz işini bitmiş hesab etdi.

Xeberle.com