Bu gün İqtisadiyyat Nazirliyinin Vətən müharibəsində şəhid olmuş əməkdaşı Asəf Səfəralı oğlu Nəsibovun anım günüdür.
Xeberle.com xəbər verir ki, onun adının əbədiləşdirilməsi məqsədi ilə "Sumqayıt Kimya Sənaye Parkı” MMC-nin nəzdində Peşə Təhsil Mərkəzinin inzibati binasında şəhidin xatirə lövhəsinin açılışı olub.
Qeyd edək ki, qəhrəman şəhidimiz A.Nəsibov 1994-cü il fevralın 25-də Qazax rayonunun Qaymaqlı kəndində anadan olub və həmin kənddə orta məktəbi bitirib. 2011-2015-ci illərdə Azərbaycan Dövlət Neft Akademiyasında Kimya mühəndisliyi ixtisasına yiyələnib. 2015-2016-cı illərdə həqiqi hərbi xidmət keçib, 2016-cı ilin Aprel döyüşlərində iştirak edib. 2018-ci ilin noyabrından İqtisadiyyat Nazirliyinin tabeliyində fəaliyyət göstərən "Sumqayıt Kimya Sənaye Parkı” MMC-də mütəxəssis və baş mütəxəssis vəzifələrində çalışıb.
Könüllü olaraq cəbhəyə getmək üçün müraciət edən A. Nəsibov Vətən müharibəsinin ilk günlərində hərbi xidmətə çağırılıb. Azərbaycan gəncinin millətinə, dövlətinə və torpağına bağlılığının bariz nümunəsi, vətənpərvərliyi ilə gələcək nəsillərə örnək olan Asəf Nəsibov Cəbrayıl, Qubadlı və Laçın rayonlarının işğaldan azad olunması uğrunda gedən döyüşlərdə iştirak edib və oktyabrın 29-da Qubadlı-Laçın istiqamətində gedən döyüşlərdə qəhrəmancasına şəhid olub.
Azərbaycan Prezidentinin müvafiq sərəncamları ilə göstərdiyi igidlik və şücaətə görə A. Nəsibov "Vətən uğrunda”, "Cəbrayılın azad olunmasına görə”, "Qubadlının azad olunmasına görə”, "Laçının azad olunmasına görə” və "Hərbi xidmətlərə görə” medalları ilə təltif edilib.
Şəhidimiz nişanlı idi, qələbədən sonra toyu olacaqdı. Şəhidimizin məzarı Qaymaqlı kənd qəbiristanlığında yerləşir.
Xəbərdən istifadə edərkən istinad etmək vacibdir.
