DYP əməkdaşlarına mübahisəli məqamlarla bağlı istənilən sualları ünvanlamaq olacaq.
Sürücü və piyadaların maarifləndirilməsi, yollarda təhlükəsizliyin təmin edilməsi məqsədi ilə Azərbaycanın aparıcı radiolarından olan 107.7 – "AvtoFM”-in Dövlət Yol Polisi ilə birgə layihəsi olan "İnspektor” verilişi yayıma başlayıb. "İnspektor” verilişində Dövlət Yol Polisinin fəaliyyəti, yol nişanları, yol-nəqliyyat hadisələri və onların baş vermə səbəbləri, yol hərəkəti qaydalarının pozulmasına görə məsuliyyəti müəyyən edən qanunvericilik aktları və nəqliyyatla bağlı digər məlumatlar, bundan başqa, sürücülük vəsiqəsi, texniki baxış, nəqliyyat vasitələrinin qeydiyyatı, istər sürücü, istərsə də piyadalar üçün nəzərdə tutulan cərimələr haqqında qanunlara edilən dəyişikliklər kimi məsələlərə toxunulacaq. Verilişdə Dövlət Yol Polisinin rəsmi nümayəndələri, eləcə də peşəkar hüquqşünaslar iştirak edəcək. Canlı efir vasitəsi ilə dinləyicilərə Dövlət Yol Polisinin rəsmi nümayəndələrinə, eləcə də peşəkar hüquqşünaslara yol hərəkəti və mübahisəli məqamlarla bağlı istənilən sualları ünvanlamaq imkanı veriləcək. Verilişə bağlanmaq üçün dinləyicilər bütün mobil operatorlardan *1077 nömrəsinə zəng edə və ya 1077 nömrəsinə SMS yaza bilərlər. "İnspektor” verilişi həftənin bazar ertəsi, çərşənbə və cümə günləri saat 18:00-dan 20:00-dək Aydın Əliyevin və Rövşən Həsənovun təqdimatında107.7 – "AvtoFM”-in efirində yayımlanacaq. Əlavə edək ki, efir vasitəsi ilə Azərbaycanda hər bir sürücü yol hərəkəti qaydalarının pozulması ilə əlaqədar tətbiq edilən cərimə balları barədə məlumatları sürücülük vəsiqəsinin nömrəsi, doğum və vəsiqənin son istifadə tarixini 1077 nömrəsinə yazmaqla öyrənə biləcək. (oxu.az)