Azərbaycan HR İnstitutu ilk "İnsan Resursları üzrə Peşə hazırlığı" (İRPH) proqramının tədrisini başa vurub.
Xeberle.com xəbər verir ki, 30 oktyabr il tarixində "Hilton Baku" otelində İnsan Resursları üzrə Peşə hazırlığı (İRPH) proqramının məzunlarının təltifolunma tədbiri baş tutub. Tədbirdə Azərbaycan HR İnstitutunun təsisçisi Emil Hüseynov çıxış edib. Təsisçi çıxışında insan resursları üzrə kadr hazırlığının önəmi və ölkəmizdə bu sahəyə xüsusi diqqətin mühümlüyünü vurğulayıb.
GDG Professionals şirkətinin Baş direktoru Gülzar Quliyeva tərəfindən "İnsan Resursları üzrə Peşə hazırlığı" (İRPH) proqramının məzunlarına "HR masterklass” keçirilib. Təhsildə Keyfiyyətin Təminatı Agentliyinin qeyri-formal və informal təhsilin tanınması şöbəsinin müdiri Samirə Quliyeva və Dövlət Məşğulluq Agentliyinin Peşə hazırlığı şöbəsinin müdiri Kənan Bağırov tədbirdə çıxış edərək Azərbaycan HR İnstitutunun cari fəaliyyətini yüksək qiymətləndirib, "İnsan Resursları üzrə Peşə hazırlığı" (İRPH) proqramının məzunlarına gələcək karyeralarında uğurlar arzulayıblar.
Qeyd edək ki, Azərbaycan HR İnstitutunun əsas məqsədi ölkəmizdə insan kapitalının inkişafına dəstək verməkdir. İnstitut həmçinin insan resursları üzrə beynəlxalq akkreditasiyadan keçmiş "Milli Sertifikasiya” proqramlarının peşəkar tədrisini icra edir.
Xəbərdən istifadə edərkən istinad etmək vacibdir.
