Sumqayıtda narkomaniya ilə mübarizə tədbirləri davam etdirilir.
Xeberle.com xəbər verir ki, növbəti tədbir Sumqayıt şəhər 16 nömrəli orta məktəbdə keçirilib. "Narkomaniyaya yox deyək, əsrin bəlası olan ağ ölümlə mübarizə" mövzusunda təşkil edilən tədbirdə Sumqayıt şəhər Polis İdarəsinin, Sumqayıt Təhsil şöbəsinin, Narkoloji dispanserin, Gənclər və İdman Baş İdarəsinin nümayəndələri, məktəbin müəllim və şagirdləri iştirak edib.
Tədbirdə çıxış edən Sumqayıt şəhər Polis idarəsinin əməkdaşı Azər Bağırov bildirib ki, cəmiyyətdə "ağ ölüm” kimi qəbul edilən, bəşər övladının baş bəlasına çevrilən, əhalinin, daha doğrusu, gənc nəslin bir qismində sonsuz maraq doğuran, aludəçilik yaradan, müalicəsi olduqca çətin və uzun müddət tələb edən, insan cəmiyyətinin mənəvi və əxlaqi dəyərlərinə böyük zərbə vuran narkotik vasitələr, onların qanunsuz dövriyyəsi, istifadəsi, satışı, ümumiyyətlə, narkomanlıq ən ağrılı problemlərdən, qorxulu vərdişlərdən birinə çevrilib. Bunun qarşısının alınması üçün ölkəmizdə mühüm addımlar atılır. Sumqayıt şəhər Polis İdarəsinin Narkotiklərlə mübarizə bölməsinin rəisi İlham Rəhimov Sumqayıt şəhərində narkotiklərlə mübarizə işlərində mühüm addımların atıldığını bildirib və bir çox işlərə də nail olunduğu diqqətə çatdırıb. Sumqayıt şəhər Təhsil Şöbəsinin metodisti Cəmilə Fəyyaz gənclər arasında keçirilən bu cür tədbirlərin əhəmiyyətindən danışıb.
Bildirilib ki, narkotik maddələrin gənc nəsillər arasında daha tez yayılması təhlükəsini nəzərə alaraq, dünyanın bir çox ölkələri "Narkotiksiz gələcək naminə” milli proqramlar qəbul edir. Bu proqrama təhsil ocaqlarında, hüquq mühafizə orqanlarında, təşkilatlarda narkomaniyanın ziyanı haqqında maarifləndirmə kompaniyaları daxildir. Bu kampaniyalar kütləvi informasiya vasitələri, o cümlədən internet şəbəkəsi vasitəsilə aparılır.
Narkoloji dispanserin həkimi Vüsal Cabbarov narkotik vasitə qəbul edən insanların bədənlərində əmələ gələn yaralardan, onların həyatının necə mərhələli şəkildə məhvə doğru getməsindən danışıb.
Respublikamızda narkotik vasitələrin, psixotrop maddələrin və onların prekursorlarının, digər bihuşedici maddələrin qanunsuz dövriyyəsinə qarşı mübarizə xeyli güclənib.
Digər çıxış edənlər də keçirilən tədbirin əhəmiyyətindən danışıblar. Gənclərə öz tövsiyyələrini veriblər.
Çıxışlardan sonra narkomaniyanın fəsadlarından bəhs edən videoçarxa baxılıb.
Tədbir diskussiya şəklində davam etdirilib.
Xəbərdən istifadə edərkən istinad etmək vacibdir.
