Azərbaycanda şagird və tələbələrin ən ciddi bəlalardan biri sayılan narkomaniya ilə bağlı məlumatlılıq səviyyəsinin artırılması üçün yeni kampaniyaya start verilir.

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupundan verilən məlumata görə, Azərbaycan prezidentinin 2013-cü il 24 iyun tarixli, 2966 nömrəli sərəncamı ilə təsdiq edilmiş "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”na müvafiq olaraq həyata keçiriləcək.

Şagird və tələbələrin antinarkotik dünyagörüşünün formalaşdırılması və gənclərin bu sahədə maarifləndirilməsi məqsədilə 9 fevral tarixindən 6 mart tarixinədək Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası və Gənclər və İdman Nazirliyinin birgə təşkilatçılığı ilə "Həyatla oyun” teatr tamaşasının tərtib olunmuş qrafikə uyğun olaraq respublikanın bir sıra şəhər və rayonlarında nümayişi nəzərdə tutulub. Bura Bakının bütün rayonları, o cümlədən Abşeron, Hacıqabul, Sabirabad, Saatlı, Beyləqan rayonları və Sumqayıt şəhəri daxildir. "Həyatla oyun” teatr tamaşasının nümayişinə fevralın 9-da Bakının Suraxanı rayonunda start veriləcək.