Ölkə prezidenti İlham Əliyev Sumqayıt şəhərinə son - 25 fevral tarixində səfəri zamanı şəhərə 5 milyon manat ayırıb. Bu vəsait Sumqayıt şəhərinin sosial-iqtisadi inkişafının sürətləndirilməsi və abadlıq işlərinin davam etdirilməsi məqsədi ilə Azərbaycan Respublikasının 2014-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Sumqayıt Şəhər İcra Hakimiyyətinə yönəldilib.
Sumqayıtda 2013–cü ildə sosial-iqtisadi inkişafın yekunları və 2014–cü ildə qarşıda duran vəzifələrin müzakirəsi zamanı bu vəsaitin hansı istiqamətlərə xərclənəcəyi açıqlanıb. Beləliklə 5 milyon manat aşağıdakı kimi sərf ediləcək:

- 2 milyon manat – “Nəsimi” adına Mədəniyyət və İstirahət Parkında yenidənqurma və abadlıq işlərinə, həmçinin bu işlər çərçivəsində parkda Xocalı abidəsinin yaradılmasına;
- 1,5 milyon manat küçələrin – xüsusən Sülh, Koroğlu, Məhəmməd Əsədov küçələrinin asfaltlanmasına;
- 1,5 milyon manat Heydər Əliyev Parkının abadlaşdırılmasına və binaların fasadının yenilənməsinə sərf ediləcək.

Qeyd edək ki, şəhər icra hakimiyyətinin başçısı yanında şuranın geniş yığıncağında müəssisə, idarə və təşkilatların rəhbərləri, media və ictimaiyyət nümayəndələri də iştirak ediblər.

Elnur Ağayev, Xeberle.com