Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin Mərkəzi Kitabxanası "Şəhidlər ölməz, Vətən bölünməz” layihəsi çərçivəsində növbəti videoçarxı təqdim edib.
Baş İdarədən Xeberle.com-a bildirilib ki, videoçarxda Metodika və biblioqrafiya şöbəsinin metodisti İradə Hüseynova şəhid Rüfət Mustafayev haqqında məlumat verib.
Bildirilib ki, Rüfət Mustafayev 1996-cı il martın 12-də Sumqayıt şəhərində dünyaya göz açıb. İbtidai təhsilinə 2002-ci ildə Sumqayıt şəhəri 18 nömrəli məktəbdə almağa başlayıb və 2013-cü ildə həmin məktəbdə məzun olub. Elə həmin il dövlət imtahanını uğurla keçərək Azərbaycan Texniki Universitetinin "Maşınqayırma və robototexnika" fakültəsinə qəbul olunub. 2019-cu ildə Azərbaycan Silahlı Qüvvələri Quru Qoşunlarının sıralarında həqiqi hərbi xidmət keçmək üçün ordu sıralarına könüllü gedib.
İkinci Qarabağ müharibəsinə zamanı Rüfət Mustafayev döyüşlərin ən qaynar nöqtələrində xidmətinə davam edib.
2020-ci il oktyabrın 9-dan 10-na keçən gecə Ağdərə istiqamətində gedən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən idarə etdiyi minik avtomobili ilə minaya düşərək komandiri Polkovnik-leytenant Cəfərov Zaur ilə birlikdə qəhrəmancasına şəhid olub.
Azərbaycan Silahlı Qüvvələrinin əsgəri, Vətən müharibəsinin şəhidi Rüfət Zöhrab oğlu Mustafayev Vətən müharibəsindəki hərbi vəzifəsini yerinə yetirərkən igidlik və mərdlik nümunəsi göstərdiyinə görə ölümündən sonra Azərbaycan Respublikası Prezidentinin sərəncamları ilə "Vətən uğrunda”, "Cəsur döyüşçü” və "Suqovuşanın azad olunmasına görə” medalları ilə təltif olunub.
Xəbərdən istifadə edərkən istinad etmək vacibdir.
