Məktəblilər əvvəlcə muzeyin "Şəhidlər Qalereyası” zalında "44 günlük Zəfər Yolu” sərgisi ilə tanış oldular və vətənpərvərlik mövzusunda hazırladıqları bədii kompozisiyanı təqdim etdilər.

Sonra tədbir mühazirə zalında davam etdirildi.

Öncə 20 Yanvar faciəsi qurbanlarının və torpaqlarımızın azadlığı uğrunda canlarından keçmiş şəhidlərimizin xatirəsi bir dəqiqəlik sükutla yad edildi.

Tədbirdə bildirildi ki, 20 Yanvar faciəsi xalqımızın yaddaşına Qara Yanvar gecəsi kimi həkk olunmuşdur. Bu tarix həm şəhidlərin anım günü, həm də Azərbaycanın ərazi bütövlüyü uğrunda mübarizə aparan xalqımızın birlik, fəxr və şərəf günüdür. 1990-cı il yanvarın 19-dan 20-nə keçən gecənin əsas məqamlarını özündə əks etdirən "20 Yanvar istiqlal tariximizin zirvəsidir” mühazirəsi, həmin gecə baş verən faciə qurbanlarının muzeyin fondunda mühafizə olunan fotoşəkilləri, yanvar faciəsinin iştirakçısı, sumqayıtlı rəssam Nizami Dadaşovun rəsm əsərlərindən ibarət sərgisi iştirakçıların diqqətinə çatdırıldı. Sumqayıt Dövlət Universitetinin tarix fakültəsinin istehsalat təcrübəsində olan tələbələrinin də iştirak etdiyi tədbirdə daha sonra "20 Yanvar - əsarətin son gecəsi” adlı sənədli film nümayiş olundu.

Muzeyin direktoru Aygün Zülfüqarlı öz çıxışında Müzəffər Ali Baş Komandan İlham Əliyevin rəhbərliyi ilə qəhrəman Azərbaycan ordusunun qazandığı qələbə sayəsində indi bütün dünyada qalib xalq olaraq qürurla tanındığımızı vurğulayaraq bildirdi ki, çağdaş Azərbaycan tarixinin böyüyən nəslə çatdırılması və təbliğatı istiqamətində daimi iş aparılır və bu işdə muzeylə əməkdaşlıq etdiyinə görə məktəb kollektivinə minnətdarlığını bildirdi.

Məktəblilər hazırladıqları divar kağızını Sumqayıt şəhərinin Tarixi Muzeyinə hədiyyə etdilər.