Sumqayıt Regional Mədəniyyət İdarəsi, S.Vurğun adına Mərkəzi Kitabxana və Sumqayıt Dövlət Rəsm Qalereyasının birgə təşkilatçılığı ilə "Zirvəyə Ucalanlar" adlı sərgi-tədbir keçirilmişdir. Azərbaycan Dövlət himni səsləndikdən sonra şəhidlərin xatirəsi bir dəqiqəlik sükutla yad edildi.
Xeberle.com xəbər verir ki, moderator Hafiz Ataxanlının tarixi ekskursundan sonra Heydər Əliyevin illər öncə tədbirdə kövrək halda söylədiyi "Azərbaycan” şeiri monitorda göstərildi. Sonra "Zəng” qısametrajlı bədii filmi təqdim edildi. Qonaqlar yaradıcı heyəti: rejissor Ruslan Sabirlini, Əli Qulini, qazi Kənanı alqışladılar. Şəhidlərin şəkli əks olunan xalçaların ərsəyə gəlməsində təşəbbüs göstərmiş və bu işi yüksək səviyyədə həyata keçirmiş "Merinos” xalça şirkətinin rəhbəri Əhməd Hüseynov çıxış etdi. Şəhid anaları qrupunun koordinatoru Ruhiyyə Əhmədzadə Əhməd Hüseynova rəmzi xatirə hədiyyəsini təqdim etdi.
Digər natiqlər: din xadimi Hacı Rauf Sərdarov, Sumqayıt Şəhər İcra Hakimiyyətinin nümayəndəsi Zaur Süleymanov, Sumqayıt Regional Mədəniyyət İdarəsinin baş məsləhətçisi, şəhid anası Ceyran Həsənova, şəhid general Polad Həşimovun anası Səmayə Həşimova, şəhid Şükür Həmidovun atası Nəriman Həmidov, qazi Xəzər Abdullayev, "Azərsun"Holdinqin nümayəndəsi Əli Məmmədov, "İnayə" xeyriyyə İctimai birliyinin nümayəndəsi Rüfət Mirzəyev çıxış edərək 44 günlük mübarizədə qazanılan uğurlardan, müzəffər Ali Baş Komandan İlham Əliyevin qətiyyətindən, Ordumuzun qüdrətindən, şəhidlik məqamının ucalığından danışdılar.
Polad Həşimov adına Sumqayıt şəhər 28 saylı orta məktəbin şagirdi Əli Əhmədov, Mədəniyyət və İncəsənət Universitetinin 1-ci kurs tələbəsi Əli Hüseynov, Qazi övladı Dəniz Abdullazadə vətənpərvər ruhlu şeirlər söylədilər. Sumqayıt şəhər
35 saylı orta məktəbin şagirdlərinin hazırladığı kompozisiya göstərildi. Müğənnilər Azər Əzizin, Sevinc Pərinin və gitara ifaçısı Qəşəm Cəfərovun musiqi nömrələri, şəhid Anar Şükürov adına orta məktəbin şagirdləri Ayxan və Rəvan Abdullazadə qardaşlarının ifa etdiyi "Xudayar təsnifi" maraqla qarşılandı. Sonda sərgiyə baxış keçirildi.
Xəbərdən istifadə edərkən istinad etmək vacibdir.
