Azərbaycan Respublikası Dövlət Neft Şirkəti "Azərikimya” İstehsalat Birliyinin (İB) konfrans zalında "Çirklənmə və Sağlamlıq” Qlobal Alyansının ("Global Alliance on Health and Pollution”) üzvü, ekoloji çirklənmə problemləri, xüsusi təhlükə törədən çirklənmə mənbələrinin monitorinqinin keçirilməsi, inventarlaşdırılması və təmizlənməsi ilə məşğul olan "Blacksmith” İnstitutunun nümayəndələri ilə görüş keçirib.
"Blacksmith” İnstitutunun eksperti xanım Barbara Consun, regional direktor Pyotr Şarolun və institutun Bakı ofisinin rəhbəri, coğrafiya elmləri doktoru, professor Rövşən Abbasovun iştirak etdikləri görüşdə "Azərikimya” İstehsalat Birliyinin Müşahidə Şurasının sədri Muxtar Babayev qonaqları səmimi salamlayaraq İB tərəfindən həyata keçirilən ekoloji layihələr haqqında məlumat verib. M.Babayev bu istiqamətdə ikitərəfli münasibətlərin yaradılmasının Sumqayıt şəhərinin ekoloji mühitinin sağlamlaşdırılması baxımından faydalı olacağını vurğulayıb.
Görüşdə qeyd olunub ki, "Blacksmith” İnstitutunun da daxil olduğu "Çirklənmə və Sağlamlıq” Qlobal Alyansı 2012-ci ildən etibarən Azərbaycanda "İnsan orqanizmi üçün potensial təsirə malik toksiki çirklənmiş ərazilərin müəyyənləşdirilməsi və qiymətləndirilməsi Proqramı” pilot layihəsi çərçivəsində fəaliyyətini davam etdirir. Bu baxımdan "Azərikimya” İB ilə də əməkdaşlıq böyük önəm daşıyır.
Görüş çərçivəsində "Global Alliance on Health and Pollution” (GAHP) təşkilatı ilə "Azərikimya” İB arasında Anlaşma Memorandumu imzalanıb.
Memorandumun şərtlərinə əsasən, Alyans 5 ay ərzində "Azərikimya” İB ilə birgə keçmiş üzvi sintez zavodunun suötürmə məntəqəsinin neft və neft məhsulları ilə çirklənmiş 2 hektar ərazisinin təmizlənməsi, ərazidən tullantıların Ekologiya və Təbii Sərvətlər Nazirliyinin "Təhlükəli Tullantılar” poliqonuna daşınması, təmizlənmiş ərazidə abadlıq işlərinin görülməsi və yaşıllıqların salınması işlərini həyata keçirəcəkdir.
Artıq Ekologiya və Təbii Sərvətlər Nazirliyinin "Təhlükəli Tullantılar” poliqonu ilə Alyans arasında müqavilə imzalanıb və ərazidə işlərə start verilib.  (azertag.az)