Sumqayıt Regional Mədəniyyət İdarəsinin tabeliyində olan Abşeron rayon Mədəniyyət Mərkəzi və Mehdiabad qəsəbə Diyarşünaslıq evinin əməkdaşları şəhid ailəsinə baş çəkiblər.
Mədəniyyət işçiləri şəhid Babək Allahverdiyevin ailəsini ziyarət edib, qayğıları ilə maraqlanıb, ailəyə maddi və mənəvi dəstək olublar.
Şəhidin anası onların övladının ali bir amal, Vətən torpaqlarının işğaldan azad edilməsi uğrunda döyüşərkən şəhidlik zirvəsinə ucaldığını, şəhidlərin xatirəsinin daim uca tutulduğunu, şəhid ailələrinin isə daima dövlətin diqqət və qayğısı ilə əhatə olunduğunu qeyd edib. Həmçinin, şəhid ailələrinə göstərilən diqqət və qayğıya görə ölkə başçısı cənab İlham Əliyev və Birinci vitse-Prezident Mehriban Əliyevaya öz təşəkkürünü ifadə edib.
Şəhid Babək Bəxtiyar oğlu Allahverdiyev 1979-cu il mayın 30-da Naxçıvan Muxtar Respublikasının Şərur rayonunun Dəmirçi kəndində anadan olub. 1986-ci ildə Bakı şəhəri Nərimanov rayonu 93 saylı tam orta məktəbdə təhsilə başlayıb. 1993-cü ildən təhsilini Cəmşid Naxçıvanski adına hərbi məktəbdə davam etdirib. 1996-cı ildə adıçəkilən məktəbi bitirdikdən sonra Heydər Əliyev adına Ali Hərb Akademiyasına daxil olub və 2000-ci ildə akademiyanı Taktiki Motoatıcı Qoşunları komandiri ixtisası üzrə bitirib.
İkinci vətən müharibəsində Kəşfiyyat Bölük komandiri Babək Allahverdiyev Füzuli, Qubadlı, Xocavənd, Şuşa uğrunda gedən döyüşlərdə iştirak edib və 2020-ci il 5 noyabr tarixində Şuşa uğrunda gedən döyüşlərdə şəhidlik zirvəsinə ucalaraq 2-ci Fəxri Xiyabanda dəfn edilib.
Azərbaycan Respublikasının Prezidenti Ali baş komandan İlham Əliyevin sərəncamına əsasən, B. Allahverdiyev ölümündən sonra Azərbaycan Respublikasnın Prezidenti cənab İlham Əliyevin Sərəncamı ilə "Vətən uğrunda”, ”Füzulinin azad olunmasına görə”, ”Xocavəndin azad olunmasına görə”, ”Şuşanın azad olunmasına görə”, ”Cəsur döyüşçü”, ”Azərbaycan bayrağı” medalları ilə təltif olunub.
Xəbərdən istifadə edərkən istinad etmək vacibdir.
