Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Qadın Təşəbbüsü və Sosial Problemlərin Həllinə Yardım İctimai Birliyi tərəfindən "Sumqayıt şəhəri və yaxın bölgələrdə əhalinin qadın hüquqları və onların müdafiə mexanizmləri barədə maarifləndirilməsi, hüquq pozuntularına məruz qalmış qadınlara sosial xidmətlərin təşkili” layihəsinin icrasına başlanılıb.
Xeberle.com xəbər verir ki, təşkilat tərəfindən fevral ayından icrasına başlanmış layihənin əsas məqsədi Sumqayıt şəhəri və digər regionlarda əhali arasında qadın hüquqları, onların müdafiə mexanizmləri barədə maarifləndirmə kampaniyalarının, hüquq pozuntularının qurbanı olmuş qadınlar üçün fərdi məlumatlandırma xidmətlərini təşkil etməkdir.
Layihə çərçivəsində qadın hüquqları mövzusunda təlimlər, ictimai müzakirələr, TV verlişlərin hazırlanması və nümayişi nəzərdə tutulur. Həmçinin layihə çərçivəsində hüquqları pozulmuş, həssas qrupa daxil olan qadınlar və onların ailə üzvləri üçün fərdi psixoloji, hüquqi, sosial xidmətlər də təşkil olunacaq.Eyni zamanda, qadınlara müəyyən ixtisasa yiyələnməkdə və sonradan işlə təmin olunmağda informasiya yardımı göstəriləcək.
Qadın hüquqları, onların müdafiə vasitələri barədə KİV-də məqalələr dərc ediləcək.
Layihənin icrası dövründə qadın hüquqları sahəsində real vəziyyətin öyrənilməsinə dair sorğular keçiriləcək. Sorğuların keçirilməsində əsas məqsəd qadın hüquqlarının pozuntusuna şərait yaradan amillərin öyrənilməsi və bu amillərin aradan qaldırılması yollarının müəyyən edilməsinə yönəlib.
Layihə çərçivəsində həyata keçiriləcək bütün fəaliyyətlərə könüllülər cəlb ediləcək.
Layihənin imkanlarından yararlanmaq istəyən xanımlar, onun icrasında könüllü qismində iştirak etmək arzusunda olan şəxslər bu əlaqə nömrələri ilə təşkilata müraciət edə bilərlər: (50) 680 22 22, (50) 300 87 88, (01864) 64 24827
Ünvan: Sumqayıt şəh, 1-ci mikr, bina 45b, Mərkəzi kitabxananın yanındakı hündürmərtəbəli binanın 1-ci mərtəbəsi.
Məlumat üçün bildiririk ki, icraçı İçtimai Birlik 2003-cü ildə yaradılıb və 2005-ci ildə dövlət qeydiyyatından keçib. Təşkilatın əsas missiyası qadınların hüquqlarının müdafiəsi, qadınların içtimai-siyasi həyatda aktivliyinin artırılması, qadınlara və onların ailə üzvlərinə pulsuz sosial, psixoloji, hüquqi və digər zəruri xidmətlərin təşkilindən ibarətdir.
Xəbərdən istifadə edərkən istinad etmək vacibdir.
