8 Mart qadınlar bayramının gəlişi ilə kişilər xanımlara hansı hədiyyə almaq üzərində baş sındırmağa başlayırlar.

Bunu nəzərə alan satıcılar isə süni bahalaşma yaradır və beləcə hədiyyəlik əşyaların, güllərin qiyməti od tutub yanır. Bu, insanlarda bir az da əsəb pozğunluğuna gətirib çıxarır.

Bir kişinin bir neçə qadına - anasına, bacısına, həyat yoldaşına alacağı hədiyyəni düşünsək, məbləğ balaca alınmaz. Elə kişilər var ki, onların məvacibi heç bir qadına belə hədiyyə almağa yetmir. Bütün bunları nəzərə alanda əksər kişilərin Azərbaycanda 8 Mart Qadınlar Gününün ləğvini arzulamasını anlamaq olar.

Mövzu ilə bağlı danışan hüquq müdafiəçisi Novella Cəfəroğlu 8 Martın qadınlara azadlıq verilən yeganə bayram olduğunu dedi: “Ona görə də bu bayram keçirilməlidir. Amma bundan başqa, Türkiyədə Analar Günü qeyd edilir. Azərbaycanda da 8 Martdan başqa, analar, atalar günü də keçirmək olar. Amma 8 Mart ləğv edilməməlidir. Çox az vaxtlarda qadınlara bu qədər dəyər verilir, hörmət edilir”.

Dini ekspert Kənan Rövşənoğlu isə bu bayramın dini baxımdan keçirilməsinin günah olmadığını bildirdi: “Dindarlar bu bayramı qeyd eləmirlər. Ancaq günah da sayılmır”.
Sirr deyil ki, 8 Mart qadın və gözəllik bayramı kimi qeyd olunur. Lakin tarixə nəzər salsaq, görərik ki, bu tarix heç də romantik hadisələr nəticəsində yaranmayıb. 8 martın Beynəlxalq Qadınlar Günü kimi qeyd olunması inqilabçı Klara Setkinin adı ilə bağlıdır.

1910-cu ildə Kopenhagendə keçirilən beynəlxalq sosialist qadınlar konfransında Klara Setkin 8 martın Beynəlxalq Qadınlar Günü kimi qeyd olunması təklifi ilə çıxış edib. Məhz bu tarixin seçilməsi təsadüfi olmayıb. Belə ki, 1857-ci ilin həmin günü Nyu-Yorkda tikiş və ayaqqabı fabrikinin qadın işçiləri nümayişə çıxıblar. Onlar 10 saatlıq iş günü, işıqlı və quru iş yeri, kişilərlə eyni maaş tələb ediblər. 1857-ci il 8 mart tarixindən sonra ilk dəfə olaraq qadın üzvlərdən ibarət “həmkarlar ittifaqı” təşkilatı yarandı. Həmin gün Nyu-Yorkun bir çox şəhərlərində yüzlərlə qadın nümayişə çıxaraq seçki hüququ da tələb edirdi.
1911-ci ilin 19 mart tarixində bu bayram Avstriya, Danimarka, Almaniya və İsveçrədə qeyd olundu. O zaman milyondan artıq kişi və qadın nümayişlərdə iştirak etdilər. “Seçmə və rəhbər vəzifələri tutma hüququ”ndan başqa qadınlar kişilərlə bərabər, eyni işləri icra etmə hüququnu da tələb edirdilər.

Rusiyada ilk Beynəlxalq Qadınlar Günü 1913-cü ildə Peterburqda qeyd olunub. Növbəti il Avropada 8 mart ərəfəsində qadınlar müharibəyə qarşı etiraz marşları ilə çıxış ediblər. 1917-ci ildə rusiyalı qadınlar “Çörək və sülh” şüarı ilə küçələrə çıxıblar. 4 gün sonra II Nikolay taxtdan salınıb. Müvəqqəti hökumət qadınlara seçmək hüququ verib. Bu hadisə də 8 mart tarixinə təsadüf edirdi.

Azərbaycanda isə bu bayram 1917-ci ildən qeyd olunur.

1965-ci ildən 8 mart artıq iş günü hesab olunmurdu. Tədricən Beynəlxalq Qadınlar Günü öz siyasi mahiyyətini itirməyə başladı. 1977-ci ildə BMT 8 martı Beynəlxalq Qadınlar Günü elan edib. Sovetlər Birliyinin dağılmasına baxmayaraq 8 Mart bir çox postsovet ölkələrində indiyədək qeyd olunur. (musavat.com)