Sumqayıtda yaşayan Vətən Müharibəsi Qəhrəmanı, Xüsusi Təyinatlı Qüvvələrin baş giziri, qrup komandiri şəhid Camal Vidadi oğlu İsmayılovun ailəsi ziyarət edilib. Sumqayıt Regional Mədəniyyət İdarəsinə tabe olan Mərkəzləşdirilmiş Kitabxana Sisteminin Nizami Gəncəvi adına Kitabxana-Klubunun əməkdaşları şəhidin ailəsinin qonağı olublar.
Xeberle.com xəbər verir ki, görüş zamanı şəhid kəşfiyyatçı Camal İsmayılov haqqında xatirələr yada salınıb. Qeyd edilib ki, igid şəhidimiz 2002-ci ildən etibarən Xüsusi Təyinatlı Qüvvələrdə xidmət edib. O, 2020-ci ilin sentyabrında başlanan Vətən müharibəsində Cəbrayıl, Füzuli, Qubadlı rayonları, həmçinin Ərgünəş yüksəkliyi və Hadrut uğrunda gedən döyüşlərdə qəhrəmanlıq göstərib, oktyabrın 19-da Qubadlı istiqamətində gedən döyüşlərdə şəhid olub.
Camal İsmayılov ölümündən sonra "Vətən Müharibəsi Qəhrəmanı” adına layiq görülüb. "Füzulinin azad olunmasına görə”, "Cəbrayılın azad olunmasına görə”, "Xocavəndin azad olunmasına görə” və "Vətən uğrunda” medalları ilə təltif edilib.
Xəbərdən istifadə edərkən istinad etmək vacibdir.
