Sumqayıt Regional Mədəniyyət İdarəsinə tabe olan Sumqayıt şəhərinin Tarixi Muzeyində Xocalı faciəsinin 30-cu ildönümü ilə əlaqədar "Xocalı tarixi yaddaşımızdır” adlı anım tədbiri keçirilib. Tədbir Xocalı soyqırımı qurbanları və şəhidlərin xatirəsinin bir dəqiqəlik sükutla yad edilməsi ilə başlanılıb. Tədbiri giriş sözü ilə açan muzeyin direktoru Aygün Zülfüqarlı 30 il əvvəl törədilən cinayətin tarixindən bəhs edərək Müzəffər Ali Baş Komandan İlham Əliyevin rəhbərliyi ilə Azərbaycan Ordusu tərəfindən 44 günlük vətən müharibəsində qazanılan qələbənin böyük təskinlik olduğunu və bu müharibədə həlak olan şəhidlərimizin qanının yerdə qalmadığını bildirib.
Kütləvi ekspozisiya şöbəsinin müdiri tədbir iştirakçılarına "Xocalı tarixi yaddaşımızdır” adlı mühazirə təqdim edib. Sənaye və Yüksək Texnologiyalar üzrə Sumqayıt Dövlət Peşə Mərkəzinin direktoru Adil Tapdıqov öz çıxışında gənclərin vətənpərvərlik ruhunda tərbiyə alması istiqamətində aparılan mühüm işlərdən danışıb.
Sumqayıt Dövlət Universitetinin tarix fakültəsinin istehsalat təcrübəsində olan tələbəsi Nərgiz Məmmədova isə öz çıxışında Xocalı soyqırımının baş verdiyi tarixi vəziyyətdən bəhs edib.
Sonda tədbir iştirakçılarına muzeyin fondlarından tərtib olunan Xocalı faciəsinin dəhşətlərini özündə əks etdirən sərgi və videoçarx təqdim edilib.
Xəbərdən istifadə edərkən istinad etmək vacibdir.
