Rusiyanın Prikamsk vilayətində azərbaycanlı biznesmen, Azərbaycana meşə materiallarının göndərilməsi ilə məşğul olan Afiq Əliyevin və ortağının işi məhkəməyə göndərilib.
"Kommersant” qəzeti bu cinayət işi haqda yazır. Məqalədə bildirilir ki, biznesmen ƏDV fırıldaqçılığında və xaricə meşə materiallarının ixracı zamanı pul vəsaitlərinin "yuyulmasında” ittiham olunur. Üstəlik ortada sifarişli qətllər də var, qətlə yetirilənlər isə ermənidir.
İstintaq materiallarına əsasən "Lesinvest” Açıq Səhmdar Cəmiyyətinin faktiki rəhbəri olan Afiq Əliyev nəzarətində olan səhmdar cəmiyyət vasitəsilə meşə materiallarının ixracına dair bir sıra formal müqavilələr bağlayıb, bu müqavilələri Federal Vergi Xidmətinə təqdim edərək ixraca görə nəzərdə tutulan ƏDV-ni büdcədən alıb. İstintaq əmindir ki, əslində heç bir real sövdələşmə olmayıb.
Bu işin istintaqı zamanı hüquq-mühafizə orqanları Solikamsk şəhərinin baş arxitektoru olan erməni Olqa Karapetyanın da qətlinin üstünü açıblar. Məlum olub ki, bu qətli Afiq Əliyevin tanışları törədib. Cinayət işində A.Əliyevin tanışı və biznes tərəfdaşı Natalya Seletkovanın da adı keçir. Ancaq onların heç biri irəli sürülən ittihamları qəbul etmir.
Cinayət işinin materiallarına əsasən Afiq Əliyev 84 milyon rubl məbləğində ƏDV fırıldağında ittiham olunur. Bu maliyyə fırıldağına dair cinayət işi əvvəlcə Privoljsk vilayəti üzrə DİN Baş idarəsi tərəfindən 2012-ci ildə qaldırlıb, daha sonra iş Perm vilayəti üzrə DİN Baş idarəsinə verilib.
İstintaq müəyyən edib ki, A.Əliyevin nəzarətində olan "Lesinvest” ASC Azərbaycana ixrac etmək üçün kağız üzərində "Lesomir” ASC-dən meşə materialları alıb, həmin səhmdar cəmiyyət isə öz növbəsində meşə materiallarını "Forest” ASC-dən aldığını sənədləşdirib.
Hüquq-mühafizə orqanları hesab edir ki, bu müəssisələr A.Əliyevin və Sletkovanın nəzarətində olub, eyni hüquqi ünvanda qeydiyyatdan keçib. A.Əliyev cəmi dörd epizod üzrə iri məbləğdə maliyyə fırıldağında və "pul yuma”da ittiham olunur.
Bu cinayət işinin istintaqı zamanı hüquq-mühafizə orqanları Perm sakini olan Artur Abramyanın və Solikamsk şəhərinin baş arxitektoru Olqa Karapetyanın da qətlinin üstünü açıblar. A.Əliyevin ətrafını araşdıran əməliyyatçılar müəyyən ediblər ki, onun mühafizəçiləri keçmiş xüsusi təyinatlı döyüşçü Azər Əkbərov və Eldəniz Məmmədovdur.
Fırıldaq işi üzrə axtarış zamanı əməliyyatçılar Əkbərovdan "TT” tapançası, 34 patron, səsboğucu, 16 kalibirli ov tüfəngi aşkar ediblər. Onun telefonunda isə Olqa Karapetyanın güllələndiyi tüfəngin şəkli tapılıb. Bu qətlə görə Əkbərov 23 il, E.Məmmədov 15 il həbs cəzası alıb. Qətlin sifarişçisini müəyyən etmək mümkün olmayıb. (virtualaz.org)
Xəbərdən istifadə edərkən istinad etmək vacibdir.
