Son illər bütün dünyada əlamətdar günlərlə bağlı maraqlı tendensiya yaşanır. Belə ki, ailə qurmağa hazırlaşan şəxslər həmin günü yaddaqalan hadisə (məsələn 12.12.12-ci il tarixi) yaxud digər bir tarixlə bağlamaq istəyirlər. Əlbəttə, ailə quranlar üçün bu baxımdan ən əhəmiyyətli gün 14 fevral Sevgililər günüdür. Bu gün dünyanın bir çox ölkələrində nigah və toy bumu yaşanacaq. Müstəqillik illərində Azərbaycanda bu bayram qeyri-rəsmi şəkildə qeyd olunmağa başlanıb.Bu gün Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) mərkəzlərində 85 cütlüyün nikahının qeydiyyata alınması gözlənilir. ASAN Xidmətin İnformasiya təminatı şöbəsinin müdiri Anar HüseynovOxu.Az-a bildirib ki, 85 cütlük xidmətin 7 mərkəzinə - Bakıda 4 mərkəz və regionlarda – Sumqayıt, Gəncə və Sabirabad mərkəzlərinə Sevgililər günündə nikaha daxil olmaq üçün müraciət edib. Anar Hüseynov qeyd edib ki, həmin şəxslər nikahla bağlı ASAN Xidmətə yanvarın 14-də müraciət ediblər. (oxu.az)