Sumqayıt şəhər Nəqliyyat Departamentinin rəisi Mahir Nəbiyev isə susur

Sumqayıt şəhərində ən vacib və gündəmdə olan məsələlərdən biri nəqliyyat sistemi, marşrutların hərəkət qrafiki, əhaliyə hansı səviyyədə xidmət etməsi problemidir. Bununla bağlı dəfələrlə portlamıza şikayətlər daxil olub.

Bir neçə gün müddətində sözügedən mövzu barədə şəhər sakinləri arasında sorğu apardıq. Respondentlərimizə aşağıdakı suallarla müraciət etdik.

- Sumqayıtda hansı marşrutların xidmətindən - iş qrafiki, intervalından narazısınız? (Tutalım, hansı marşrut avtobuslar, axşam saat 23:00-dək işləməli olduğu halda, 1-2 saat qalmış fəaliyyətlərini dondururlar? Yaxud, misal üçün, 5 dəqiqədən bir gəlməli olduğu halda, çox zaman gecikirlər?)

 - Bəs hansılardan razısınız?

Şəfaqət Telman
- 6 nömrənin sürücüləri demək olar ki, sürməyi bilmir, çox sürətlə sürür, böyük, kiçik bilmir, deyəndə ki, yavaş sürün, əhəmiyyət də vermirlər. 4-6 dəqiqədən bir gəlmək əvəzinə, 10 dəqiqəyə gəlirlər. Bir də Heydər Əliyev heykəlinin yanında avtobusların gəlmə vaxtını və hansı marşrutların burdan keçməsi göstərilsə də, əksəriyyəti doğru deyil.


Elmir Hacıyevski
- 55 nömrə demək olar ki, hava qaralanda işləmir.

Ceyhun Mahmudzadə
- 17 nömrənin - bağlara işləyən marşrutun - imkanım olsaydı, sürücülərini bir yerə bağlayıb yandırardım...

Dilşad Abdullayeva
- 7 və 10 nömrəli marşrutların sürücülərindən çox narazıyam. Heç veclərinə belə deyil insanların həyatı. Ancaq 2 nömrəli marşrutdan razıyam.

Cənab Abbasov
- Demək olar ki, marşrutlardan çox az istifadə edirəm. İnterval məsələsi yox, məni harda gəldi saxlayıb sərnişin götürmələri narahat edir və bu da yollarda müəyyən vaxt ərzində tıxaclara səbəb olur, həmçinin sürücülərin psixologiyasına birbaşa mənfi təsir edən amillərdən birinə çevrilir.

Banu Əli
- Gündəlik həyatımda marşrutdan istifadə etmədiyimə görə sorğuda təqdim olunan hallarla rastlaşmıram. Hərdən 7, bəzən də 5 nömrəli marşrutlardan istifadə edirəm, onda da sürücünün insan yox, sanki "kartof-soğan" daşımasının şahidi oluram. Marşrutun kiçik pilləkəninə qalxar-qalxmaz maşını sürən sürücüylə yerimi dəyişmək istərdim ki, görüm "o" həmin anda nə edərdi?!

Mehman Məmmədov
- 5 nömrəli marşrut çox əla işləyir. 34 nömrəli isə yox.

Elnur Ağayev
- Mən 5, 2 və 7 saylı marşrutların işləmə qrafikindən razıyam, amma qalanları çox zəifdir. Tutalım, 9 və 10 saylı avtobuslar bir az qaranlıq düşən kimi yoxa çıxırlar, 9 saylı lap "xaltura edir".

Aygün Əlizadə
- 6 nömrəli marşrut saat 8-dən 9-dan sonra işləmir və gec-gec gəlir. Hətta dayanacaqda 10 dəqiqə də gözləyirik. 12 nömrədə (Saray marşrutunda) də vəziyyət bərbaddır. Gedib gələn çox, marşrut balaca. Səhər və axşam 5-dən sonra minmək olmur. Yaxşı olar kı, Bakıda olduğu kimi, Sumqayıtda da elektron tablolar quraşdırılsın. Bilək ki, hansı marşrut hansı intervalla gəlməlidir.Marşrtların gecikməyinin başqa səbəbi də sakinlərimizdədir. Dayanacaqlarda düşmürlər, sürücüdən harda gəldi saxlamalarını istəyirlər. Halbuki dayanacaqlar arasında məsafə yaxındır. 7 nömrəli marşruta minməyə peşman olursan. Hər addımda saxlayır. Və ən pisi də odurki ayağını pilləkənə qoyan kimi avtobusu sürürlər. Vay o gündən ki, körpə uşaqla minəsən.


Fuad Hacıyev
- 3 nömrə gec-gec gəlir. Hələ bu, azmış kimi yolunu da dəyişdilər. İndi 3 nömrəyə minmək üçün gərək başqa marşruta minəsən gedəsən bazara. İşə gedib gəlmək üçün 4 marşrut dəyişməli oluram.

Ramil Məmmədov
- Mən deyərdim ki, ən bərbad marşrut 6-dır, nə intervalı bilinir, nə də iş saatı...

Elçin Abdullayev
- Mən 6 və 17 nömrəli marşrutların qrafiklərindən narazıyam.

Aytən Əli
- 6A marşrutu üzrə hərəkət edən avtobuslar tökülüb gedir. Bəzilərinin qapısı belə bağlanmır. Bəzi sürücülər də sərnişinlərlə kobud rəftar edirlər.

Sübhan Arifoğlu
- Hər bir marşrut avtobusu 5-ci mkr.-da – Azpetrol-dan 20 metr qabaqda qoyulmuş təzə dayanacaqda dayanmır.

İsmayıl Kərimov
- Mən 34, 9 və 42 saylı marşrutların iş fəaliyyətindən narazıyam...

Sorğu əsasında aydın oldu ki, respondentlər ümumilikdə 17, 6, 34, 9, 12, 55, 42 saylı marşrutların işləmə qrafikindən narazı, 2, 5, 7 saylı marşrutların işləmə qrafikindən isə razıdırlar. 6 saylı avtobusların azlığı (xüsusən saat 6-dan sonra), 9-10 saylı avtobusların gecə düşən kimi azlığı, xüsusən 9 saylı marşrutun axşam saatlarında yol qrafikinə əməl etməməsi, 12 saylı marşrutun sərnişinin çox, avtobuslarının isə balaca – kiçiktutumlu olması qeyd edilib. 7 saylı avtobus sürücülərinin təhlükəli sürməsi, harda gəldi saxlaması sakinlər tərəfindən tənqid olunub.

Sözügedən problemlərlə əlaqədar bizi maraqlandıran sualları cavablandırmaq üçün Sumqayıt şəhər Nəqliyyat Departamentinə, şəxsən Mahir Nəbiyevə dəfələrlə müraciət etmiş, əlaqə saxlamağa çalışmışıq. Amma rəis ya telefona cavab verməyib, ya da ki, vaxtı təyin edib özü iş başında olmayıb. Bu hal dəfələrlə təkrarlanıb.

Könül Salahova, Xeberle.com

P.S. Hələ də Mahir müəllimin mətbuata açıq olacağını, açıqlama verəcəyini gözləyirdik...
Sonuncu dəfə isə - 19 fevral tarixində M.Nəbiyev xanım müxbirimizlə görüş üçün saat 2-də idarəyə gəlməsini desə də, yerində tapılmayıb. Hər halda biz nə az nə çox, ay yarım Mahir Nəbiyevin kaprizlərinə dözəsi olduq.