Yer kürəsinin fırlanmasına şübhə edənlər karvanına azərbaycanlı alim də qoşulub.
Azərbaycan Milli Elmlər Akademiyasının Əlyazmalar İnstitutunun əməkdaşı Əkrəm Həsənov sosial şəbəkədə Yer kürəsinin fırlanmadığını iddia edən fikirlər qeyd edib.
O bildirib ki, bəzi ölkələrdə 6 ay gündüz, 6 ay gecə olur. Alim Yerin fırlandığı ilə bağlı nəzəriyyələrə etibar etmədiyini açıq-aşkar bəyan edib:
"Norveçdə dünyanın ən yüksək pilləsində Günəş üç ay müdətinə qədər batmır. Əgər Yer kürəsi fırlansaydı Günəş batardı. Deməli anlamalıyıq ki, bizə verilən dünyəvi məlumatlar elmi də olsa belə, bunu sübut edən böyük dəlillərə ehtiyacımız var. Həmçinin 6 ay gündüz və 6 ay gecə olan ölkələr var. Bəs Yer kürəsi necə fırlanır ki, həmin bölgələrdə gecə və gündüz 6 ay davam edir".
Alim bu prosesləri nəzərə alaraq belə bir nəticəyə gəlib: "Belə çıxır ki, həmin ölkədə yer kürəsi 6 ay fırlanmır? Bax unutmayaq ki, oxuduqlarımız, elm olaraq anladıqlarımız da hələ bizə qaranlıqdır", - deyə alim qeyd edib.
Qeyd edək ki, Səudiyyə Ərəbistanından olan bir imam gülünc iddia səsləndirib. Şeyx Bender Əl Hayberi dünyanın fırlanmadığını iddia edib. Bu iddia dünya üzrə geniş müzakirə mövzusuna çevrilib.  (anspress.com)