Sumqayıt Regional Mədəniyyət İdarəsinə tabe olan şəhər Mərkəzləşdirilmiş Kitabxana Sisteminin (MKS) Mərkəzi Uşaq Kitabxanasında 1 nömrəli tam orta məktəbin 4E sinif şagirdlərinin və müəllim kollektivinin iştirakı ilə Aprel döyüşlərinin iştirakçısı və Vətən müharibəsi şəhidi Ramil Elşən oğlu Quliyevə həsr olunan "Bir ömür yaşandı nağıllar kimi” adlı tədbir keçirilib.
İdarədən Xeberle.com-a bildirilib ki, tədbir Vətənimizin bütövlüyü və torpaqlarımızın işğaldan azad edilməsi uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə başlayıb.
Kitabxananın baş kitabxanaçısı Ali Baş Komandan İlham Əliyevin rəhbərliyi ilə Vətən müharibəsində qazanılan möhtəşəm Qələbədən və bu Qələbədə böyük pay sahibi olan şəhidlərdən biri Ramil Quliyevin qısa, ancaq şərəfli həyat və döyüş yolu haqqında məlumat verib.
Sonra şəhid haqqında "Gözlə məni, anam mənim” poemasının müəllifi Vaqif Rəsul çıxış edib.
Poema əsasında hazırlanan videoçarx nümayiş olunub.
Daha sonra 1 nömrəli məktəbin ibtidai sinif müəllimi, Uşaq kitabxanasının müdiri şəhidlərimizin daim hörmət və ehtiramla yad edildiyini vurğulayıb, vətənpərvər övlad böyütdüklərinə görə Ramil Quliyevin atasına təşəkkürlərini bildiriblər.
Tədbirdə iştirak edən şəhidin atası Elşən Quliyev və bacısı Ramilə Baxşıyeva Ramilin Vətən sevgisindən, döyüşlərdə göstərdiyi şücaətlərdən danışıb, diqqət və qayğıya görə ölkə rəhbərliyinə təşəkkürlərini bildiriblər.
Sonra şagirdlərin ifasında mahnı və şeirlər səsləndirilib.
Tədbir Sumqayıt Şəhidlər xiyabanının ziyarəti ilə davam edib.
Xəbərdən istifadə edərkən istinad etmək vacibdir.
