Risk naviqatoru” "qəza ocaqları”nın yerini göstərməklə sürücüləri həmin yerlərdə ehtiyatlı olmağa sövq edəcək. Bunu "AXA MBASK” sığorta şirkətinin marketinq və ictimaiyyətlə əlaqələr departamentinin müdiri Rəşid Rəsulov deyib.
Xatırladaq ki, şirkətin bu gündən istifadə verdiyi "Risk naviqatoru”nda 2014-cü ildə və bu ilin yanvar ayında ölkə ərazisində baş vermiş, sığorta hadisəsi olan 5500-dən çox avtomobil qəzası qeyd olunub. Bundan başqa, Rusiyanın Stavropol şəhərində kasko sığorta ilə bağlı baş vermiş bir qəza da xəritəyə əlavə edilib.
Hadisə yerinə gedən sığorta şirkətinin qəza komissarları avtomobildəki GPS vasitəsilə  qəza yerinin kordinatlarını sistemə qeyd edirlər və hər ayının əvvəlində "Risk naviqatoru”ndakı məlumatlar yenilənir. İlkin olaraq virtual xəritədə  yalnız qəza ocaqları qeyd edilib. Xəritəni sığorta şirkətinin rəsmi saytından izləmək olar.
Ən riskli yollar Bakı və Sumqayıt şəhərlərində, Şimal, Qərb və Aran regionundadır
"Risk naviqatoru”na əsasən qəzalar daha çox Bakı və Sumqayıt şəhərlərində, Şimal, Qərb və Aran regionunda baş verir.  Bakıda qəzalar daha çox Yasamal, Nəsimi, Nizami və Xətai rayonlarında baş verir. Xəritədə qəzaların daha çox qeydə alındığı yerlər sırasında  Azadlıq, Neftçilər, Ziya Bünyadov, Tbilisi prospektləri, R.Behbudov, S.Vurğun, Y.Səfərov, Bakıxanov və digər küçələr yer alıb. Qəzalar daha çox yol ayrıcılarında, dairələrdə baş verib. Əsas səbəblər isə sürət həddini aşma və manevretmə qaydalarını pozmaqla bağlıdır.  Naxçıvan MR, Qax, Zaqatala, Balakən, Cəlilabad, Masallı, Lerik, Astara və Neftala rayonlarında isə qəza riskləri yox səviyyəsindədir.
"Xəritədə hər qəzanın təfərrüatı yerləşdiriləcək”
1-2 ay ərzində xəritədə hər avtomobil qəzasının təfərrüatı qeyd ediləcək. Məsələn, hadisənin yeri, tarixi, səbəbi və nəticəsi, dəymiş zərərin həcmi kimi detalların da əlavə edilməsi planlaşdırılır. R.Rəsulov bildirib ki, bundan əlavə  hansı ərazidə toqquşma və aşma riskinin çox olması, piyadaların vurulması ilə bağlı təhlükəli yollar qeyd ediləcək:"Qısa zamanda texniki məsələlər həll ediləndən sonra xəritəyə əlavələr ediləcək”.
"Risk naviqatoru”nu digər sığorta şirkətləri ilə müzakirə edə bilərik”
"Risk naviqatoru” sırf sosial yönümlü layihədir. Hər bir şəxs, xüsusilə də sürücülər və piyadalar bu xəritədən yararlana bilər. Qeyd edək ki, qəzalarla bağlı məlumatları  daha dəqiq əks etdirməsi üçün sığorta bazarında digər şirkətlərində "Risk Naviqatoru”naqoşulması vacibdir. R.Rəsulov fins.az-a bildirib ki, bu sahədə digər sığorta şirkətləri ilə əməkdaşlıq da mümkündür: "Layihə sırf "Axa MBASK” sığorta şirkətinə aid olduğundan risk naviqatoru ilə bağlı əməkdaşlıq gündəmdə deyil. Ancaq digər sığorta şirkətləri əməkdaşlıq etmək istəsələr bunu müzakirə edə bilərik”. (fins.az)