İyunun 7-də Sumqayıt Regional Mədəniyyət İdarəsinə tabe olan Nəriman Nərimanov adına Mədəniyyət Mərkəzinin Şəhər mədəniyyət evi Poeziya evində Vətən müharibəsində qəhrəmancasına həlak olan şəhidlərimiz-Daxili Qoşunların giziri Emil İsgəndərov, Azərbaycan Silahlı Qüvvələrinin hərbi qulluqçuları Eltun Əliyev və Elvin Novruzova həsr olunan "Vətən ocaqdırsa, şəhidlər oddur” adlı ədəbi-bədii gecə təşkil edilib.
Tədbirdə Sumqayıt şəhər İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Tərlan Hacızadə, Sumqayıt Regional Mədəniyyət İdarəsinin əməkdaşı, "Şəhid Analarına Dəstək” İctimai Birliyinin sədri, şəhid Əbdülməcid Axundovun anası Ceyran Həsənova, Azərbaycan Yazıçılar Birliyi Sumqayıt şəhər bölməsinin məsləhitçisi Xatirə Fərəcli, şairə Esmira Günəş, şəhidlərin yaxın qohumları iştirak ediblər.
Əvvəlcə torpaqlarımız uğrunda canlarından keçən şəhidlərimizin ruhu bir dəqiqəlik sükutla yad edilib. Aparıcılar şəhidlərimiz haqqında geniş məlumat verib, sonra onların həyat və döyüş yolları haqqında hazırlanan videoçarx nümayiş olunub, "Əsgər məktubu” adlı kompozisiya canlandırılıb.
Tədbir bədii özfəaliyyət kollektivlərinin üzvləri Aydın Sami, Aydın Lökbatanlı, Kamil Ağazadə, Əvəz Səlimov, Əli Əzizoğlu və "Veteranlar” xalq xorunun ifasında vətənpərvərlik ruhunda mahnılarla davam etdirilib.
Xəbərdən istifadə edərkən istinad etmək vacibdir.
