Sumqayıt Şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə Sumqayıt Dövlət Dram Teatrında gənclər üçün "Narkoman” adlı teatr tamaşası nümayiş olunub.
Tədbirin keçirilməsində məqsəd gənclərin zərərli vərdişlərdən uzaqlaşdırılması, sağlam gənc nəslin yetişdirilməsi, vətənpərvər, müasir gəncliyin formalaşdırılmasına nail olmaqdır.
Tədbir iştirakçıları öncə "Narkotiksiz gənclik” adlı rəsm sərgisinə baxış keçiriblər.
Daha sonra teatrın gənc aktyorlarının ifasında "Narkoman” tamaşası izlənilib.
Tədbirdə çıxış edən Baş İdarənin rəisi Elgün Hümbətov və Sumqayıt Şəhər İcra Hakimiyyəti başçısının birinci müavini Teymur Səmədov ölkədə aparılan uğurlu siyasətin nəticəsi olaraq son illərdə narkotik vasitələrə qarşı mübarizənin xeyli gücləndiyini, dövlət orqanları ilə yanaşı, qeyri-hökümət təşkilatlarının da fəallığının artdığını, gənclərin sağlamlığının qorunması istiqamətində əhəmiyyətli tədbirlərin icra olunduğunu qeyd etmişlər.
Digər çıxış edənlər millət vəkili Müşfiq Məmmədli, Regional Mədəniyyət İdarəsinin rəisi Rəşad Əliyev və Veteranlar Təşkilatının şəhər bölməsinin sədri Sovet Şükürov narkomaniyaya qarşı mübarizədə dövlət və ictimai təşkilatların birgə fəaliyyətinin vacibliyindən danışmışlar.
Tədbirdə iştirakçılara maarifləndirici xarakterli bukletlər paylanılmış, teatrın bir qrup gənc əməkdaşı uğurlu fəaliyyətinə görə Baş İdarənin fəxri fərmanları ilə təltif edilmişlər.
Xəbərdən istifadə edərkən istinad etmək vacibdir.
