Bağa baxarsan bağ olar, baxmazsan dağ olar deyiblər. Ancaq Sumqayıt şəhəri Novxanı bağları dağdan da, bağdan da çox su hövzəsi ola bilər. Özü də baxımsızlıqdan yox, bağları basan mənbəyi bilinməyən sulardan. Sakinlər deyr ki, artıq 3 həftədən çoxdur gələn suyun həcmi günbəgün artır. Ancaq bunun səbəbi qurunt sularının üzə çıxmasıdırmı, kanalizasiya sularıdır, yoxsa içməli su, müəyyən etmək çətindir. Suyun hardan gəldiyini biz də sakinlərlə bərabər müəyyənləşdirməyə çalışdıq. Ancaq bir çox həyəti gəzsək də, suyun mənbəyi ilə rastlaşmadıq. Ərazidə olan bəzi ev və həyətyanı sahələrin hasarları demək olar ki, artıq çöküb. Bir qismi isə qəzalı vəziyyətdədir. 

Su həyətlərlə yanaşı küçələri də doldurmuşdu ki, bu da hərəkəti çətinləşdirirdi. Sakinlər mövcud vəziyyətlə bağlı aidiyatı qurumlara da dəfələrlə müraciət edib.

Elə biz də bunun nə dərəcədə həqiqət olduğunu müəyyənləşdirmək üçün ilk olaraq üz tutduq Sumqayıt şəhər bələdiyyəsinə. Qurumun sədri Əbülfəz Babayev sakinlərin müraciətinə baxıldığını və suların hardan gəldiyini müəyyənləşdirildiyini bildirdi. Ancaq problemi aradan qaldırmaq elə də asan deyil. 

Sumqayıt şəhərinin bələdiyyə sədri Əbülfəz Babayev: “Orda ümumiyyətlə kanalizasiya suları ilə bərabər qurunt sularının həcmi artıb”. 

Bələdiyyə sədri onu da bildirdi ki, problemlə əlaqədar məsul qurumlar qarşısında məsələ də qaldırılıb. Nəticədə demək olar ki, var. Artıq Sumqayıt şəhər su kanalizasiya idarəsi tərəfindən Novxanı bağlarında iş aparılır. Yəni tezliklə bağlar ərazisində kanalizasiya sistemi yenidən qurulacaq. Təki o vaxta qədər bağlar sahəsi göllər məkanına çevrilməsin.

/ans.tv/