Uşaqların boy artımının geri qalması valideynləri narahat edən əsas məsələlərdən biridir. Boy artımı onların normal böyüməsi və inkişafı üçün vacibdir. Orqanizmdə baş verən bu hallar körpədə 2-5 yaşında aşkar edilir. Mütəxəssislər uşaqda boy artımını üç aydan bir ölçülərək nəzarətdə saxlanılmasını məsləhət görürlər.
Xeberle.com xəbər verir ki, həkim-nevroloq Aynur Muxtarova deyib: "Uşaqlarda boy qısalığına səbəb olan amillər müxtəlifdir. Bunlara genetik faktorlar, psixososial vəziyyətlər, uşaqlarda qidalanma pozuntusu, uzun çəkən xroniki xəstəliklərlə mübarizə, raxit kimi sümük-oynaq sistemi xəstəlikləri və ən əsası, endokrin xəstəliklər aiddir. Uşağın boyu daha çox ata və ananın boyundan asılıdır. Valideynlər qısa boyludursa, 70-80 faiz hallarda uşağın da boyu qısa olur”.
Ümumdünya Səhiyyə Təşkilatınin müəyyən etdiyi cədvələ əsasən uşaqların normal boyu həmin normalara uyğun olaraq hesablanır. Belə ki, boy artımı cədvəldə çox aşağı həddədirsə, körpə müayinə edilir, boy hormonları yoxlanılır və rentgen müayinəsi aparılaraq bioloji yaşa baxılır. Mütəxəssislərin dediyinə görə, boy artımı 17-18 yaşa qədər davam edir. Boy hormonu çatışmazlığı kliniki müayinələrlə təsdiq olunarsa, uşağın yaşına, boyuna və çəkisinə uyğun olaraq adekvat boy hormonu təyin edilir. Gündə bir dəfə inyeksiya etməklə müəyyən müddət ərzində normal boya nail olmaq mümkündür.
Boyu uzatmaq üçün basketbol, velosiped, turnikdə dartınma və üzgüçülük kimi idman növlərinin təsiri olduğu bildirilir. Onu da qeyd etmək lazımdır ki, hər idman növü də boyu uzatmır. Ağır atletika və güləş sümük uclarında böyümə hallarına təsir etdiyinə görə boy uzanması ləngiyir. "Basketbol, yüngül atletika, velosiped idman növləri boy uzanmağına səbəb olur. Həmin məşğələlər zamanı bağlar sümükləri dartdığı üçün uzununa böyümə başlayır. Bu idman növləri ilə məşğul olanlar digərlərinə nisbətən daha uca boy olurlar”,- deyə həkim-nevroloq bildirib.
İnkişaf etmiş cəmiyyətlərdə qida vərdişləri, həyat tərzi, sağlam və balanslı qidalanma boy artımına böyük təsir göstərir. Ona görə də həkimlər uşaqların qidalanması zamanı karbohidrat və şirniyyatlardan az istifadə etməyi tövsiyə edirlər.
Xəbərdən istifadə edərkən istinad etmək vacibdir.
