Sumqayıt Regional Mədəniyyət İdarəsinə tabeli Sumqayıt şəhərinin Tarixi Muzeyinin nümayəndələri şəhid Orxan Elxan oğlu Rəhimlinin ailəsini ziyarət ediblər. Kollektiv qəhrəmanın ailəsi ilə onun haqqında geniş söhbət aparıb, ailənin qayğıları ilə maraqlanıb, dəstək olmağa çalışıblar.
Orxan Elxan oğlu Rəhimli 1992-ci il 20 iyun tarixində Sumqayıt şəhərində anadan olub. 1997-ci ildə Sumqayıt şəhər Hacı Zeynalabdin Tağıyev qəsəbəsində yerləşən Laçın rayonu, Fizuzəddin Cəfərov adına məktəbə daxil olub, 2008-ci ildə həmin məktəbi bitirib. Sonra Cəlilabad şəhərində yerləşən N saylı hərbi hissədə xidmət göstərib. Hərbi xidməti başa vurduqdan sonra Quba Texniki Kollecində "Yol hərəkətinin təşkili" ixtisası üzrə təhsil alıb. 2014-cü ildən N saylı hərbi hissədə müddətdən artıq həqiqi hərbi xidmət (MAXE) vəzifəsində çalışıb. Qəhrəmanımız Aprel döyüşlərində iştirak edib. İkinci Qarabağ müharibəsində Füzuli, Cəbrayıl, Hadrut, Zəngilan, Qubadlı, Kəlbəcər və Laçının azad olunmasında iştirak edib. 28.06.2021-ci il tarixində Laçın rayonu ərazisində Kamaz markalı hərbi yük avtomobilinin qəzaya uğraması nəticəsində şəhidlik məqamına ucalaraq, Sumqayıt şəhər Şəhidlər xiyabanında dəfn olunub.
Azərbaycanın ərazi bütövlüyünün təmin edilməsi uğrunda gedən döyüş əməliyyatlarına qatılaraq şəxsi igidlik və şücaət nümayiş etdirdiyinə görə, Azərbaycan Respublikası Prezidentinin müvafiq Sərəncamına əsasən Orxan Elxan oğlu Rəhimli "Laçının azad olunmasına görə”, "Füzulinin azad olunmasına görə” medalları ilə təltif edilib.
Sonda şəhidin ailəsi göstərilən diqqət və qayğıya görə ölkə başçısına və kollektivə minnətdarlığını bildirib.
Xəbərdən istifadə edərkən istinad etmək vacibdir.
