Sumqayıt Regional Mədəniyyət İdarəsinə tabeli Mərkəzi Uşaq Kitabxanasında "Zəfər tariximizin izi ilə” layihəsi çərçivəsində 1 və 12 nömrəli tam orta məktəblərin şagird və müəllim kollektivinin iştirakı ilə Vətən müharibəsi qəhrəmanı, Xüsusi Təyinatlı Qüvvələrin "Əfsanəvi taboru"nun baş kəşfiyyatçısı, Qarabağ ordenli şəhid Şəhriyar Quliyevin ailə üzvləri ilə görüş keçirilib. Əvvəlcə ərazi bütövlüyümüzün təmin edilməsi uğrunda şəhidlik zirvəsinə ucalan qəhrəmanlarımızın əziz xatirəsi bir dəqiqəlik sükutla yad edilib. Tədbiri giriş sözü ilə açan kitabxananın baş mütəxəssisi Leyla Mahmudova Şəhriyar Quliyevin həyat və döyüş yolu haqqında məlumat verib, şəhidə həsr olunan "Sən hər kəsin qürurusan” adlı videoçarxı təqdim edib. Sonra qəhrəmanın anası Xalidə Quliyeva, atası Nəsib Quliyev, həyat yoldaşı Pərvin Quliyeva, ibtidai sinif müəlliməsi Lətafət Quliyeva Şəhriyar haqqında acılı-şirinli xatirələrini bölüşüb, ölkə rəhbərliyi və dövlət tərəfindən onlara göstərilən diqqət və qayğıdan məmnun olduqlarını bildiriblər. Şəhriyar Quliyevin oğlu Camal Quliyev "Mənim atam qəhrəmandır” adlı şeir söylədikdən sonra, döyüş yoldaşı Səxavət Salmanov onunla bağlı xatirələrini bölüşüb. Sonra tədbir vətənpərvərlik ruhunda şeirlər, musiqi nömrələri və kompozisiyalar ilə davam edib. Sonda çıxış edən Sumqayıt şəhər MKS-nin direktor v.m.i.e. Natəvan Axundzadə adları Vətən tarixinə qızıl hərflərlə yazılan şəhidlərimizin kitabxanalarda daim hörmət və ehtiramla yad edildiyini, onların gələcək nəsillərə örnək olduğunu vurğulayıb, Şəhriyar kimi vətənpərvər, mərd, şücaətli övlad yetişdirdiklərinə görə şəhidin valideynlərinə minnətdarlığını bildirib. Çıxışının sonunda o, MİHİ Sumqayıt şəhər komitəsi adından şəhidin daş üzərində işlənən şəklini anasına təqdim edib. Tədbirdən sonra kitabxana əməkdaşları bir qrup şagirdlərin iştirakı ilə "Şəhidlər xiyabanı”nı ziyarət edib, memorial kompleksdə "Qalib əsgər” heykəlinin və Şəhriyar Quliyevin qəbrinin önünə gül dəstəsi qoyaraq, Vətən uğrunda canından keçən şəhidlərin xatirəsini ehtiramla anıblar.
Allah bütün şəhidlərimizə rəhmət eləsin!
Xəbərdən istifadə edərkən istinad etmək vacibdir.
