Azərbaycan Respublikasının Prezidenti cənab İlham Əliyev çıxışlarında Zəfərlə başa çatan 44 günlük Vətən müharibəsi nəticəsində azad edilən tarixi torpaqlara Böyük Qayıdış mövzusuna mühüm yer ayırır. Bununla bağlı dövlət qurumları ilə yanaşı, bütün vətəndaşlarımızın da bu məsələyə fəal qoşulmaları tövsiyə edilir. Milli Məclisdə Böyük Qayıdışın birinci mərhələsi ilə bağlı qərar da qəbul edilib. Qeyd edək ki, dünya təcrübəsində münaqişə və müharibədən sonra köçkün düşmüş əhalinin qayıdışı zamanı təşəbbüs qrupları və icmalar yaradılır. Bu qrupların yaradılmasında məqsəd əhalinin yeni qurulan yaşayış məntəqələrində qısa müddət ərzində yaşam fəaliyyətlərinin, yeni məkana adaptasiya edilmələri üçün prosesinin sürətləndirilməsinə yardım etməkdir.

Azərbaycan Respublikası Qeyri-Hökumət təşkilatlarına Dövlət Dəstəyi Agentliyinin maliyyə dəstəyi ilə Sosial İqtisadi İnkişaf uğrunda İctimai birliyinin 3 aylıq "Qarabağa qayıdış” layihəsi başa çatdı. Layihə çərçivəsində keçmiş məcburi köçkün qadın və qızlar arasında işğaldan azad edilən torpaqlara qayıdış zamanı sakinlərin daha tez zamanda adaptasiya etmələrini sürətləndirmək məqsədi ilə təşəbbüs qrupları yaradılmışdır. Yaradılmış təşəbbüs qrupları ilə Milli Məclisin deputatları Müşviq Məmmədli, Hicran Hüseynova ilə görüşlər keçirilib, gələcəkdə görüləcək işlər barəsində fikir mübadiləsi aparılıb. Qarabağa qayıdış layihəsi çərçivəsində 80 nəfər məcburi köçkün maarifləndirilib.