Sumqayıtda I Qarabağ müharibəsi şəhidi Rövşən Həsənovun anım mərasimi keçirilib.
Anım mərasimi Sumqayıt Regional Mədəniyyət İdarəsinə tabeli Şuşa rayon Turşsu kənd Uşaq Musiqi Məktəbinin əməkdaşları və Şuşa rayon Gənclər və İdman İdarəsinin kollektivi ilə birgə təşkil olunub.
İdarədən Xeberle.com-a bildirilib ki, mərasimdə şəhidlərin xatirəsi anılıb, Rövşən Həsənovun fotolarından və həyat hekayəsindən ibarət videoçarx nümayiş olunub. Sumqayıt Regional Mədəniyyət İdarəsinin Şuşa rayonu üzrə nümayəndəsi Bayram Cəfərli şəhidin döyüş yolu barədə məlumat verib.
Sonra Şuşa rayon Gənclər və İdman İdarəsi, hərbçilər, veteran təşkilatlarının əməkdaşları, Cüdo Federasiyası, TEAS Press Nəşriyyat evinin nümayəndələri çıxışlarında Rövşən Həsənovla bağlı xatirələrini bölüşüblər.
Tədbirdə məktəbin müəllim və şagird kollektivinin ifasında musiqi nömrələri və şeirlər səsləndirilib.
Şuşa rayon Turşsu kənd Uşaq Musiqi Məktəbinin direktoru, Rövşən Həsənovun qardaşı İlham Həsənov şəhidin keçdiyi şərəfli ömür yolundan danışıb.
Tədbirin sonunda şəhidin anasının hazırladığı əl işlərindən ibarət sərgi nümayiş olunub.
Xəbərdən istifadə edərkən istinad etmək vacibdir.
