Məlum olduğu kimi, bu yaxınlarda İslam Əməkdaşlıq Təşkilatı Gənclər Forumu Avrasiya Regional Mərkəzinin (İƏTGF ARM) İdarə Heyəti Azərbaycanın Qarabağ bölgəsində, Şuşa-Xankəndi yolunda keçirilən ekoloji aksiyaya dəstək məqsədilə bəyanatla çıxış edib. Bəyanatda Rusiya sülhməramlı kontingentinin (RSK) müvəqqəti yerləşdiyi Azərbaycan ərazilərinin hələ də bu tipli monitorinqlərdən kənar və nəzarətsiz qalması təəssüflə bildirilir, eyni zamanda, keçiriləcək monitorinqlərin obyektivliyini təmin etmək məqsədilə, Azərbaycan ekoloji könüllülərinə dəstək olaraq Avrasiya regionu gənc ekoloqlarından ibarət heyətin monitorinqlərə qatılmasına hazırlıq ifadə olunur.
İƏTGF-dən AZƏRTAC-a bildirilib ki, Misirin tanınmış blogeri Əmr Al-Gizi öz instaqram səhifəsində Avrasiya Regional Mərkəzinin ekoaksiyasına dəstəyi, eləcə də Azərbaycan torpaqlarında təbii resursların qeyri-qanuni şəkildə çıxarılmasına son qoyulmasını tələb edən post paylaşıb.
Qeyd edək ki, Ə.Gizi bu yaxınlarda İƏTGF ARM–nin həyata keçirdiyi "Show me Azerbaijan – Beynəlxalq Blogerlərin Şuşa Düşərgəsi” layihəsi çərçivəsində Qarabağa səfər edərək öz yutub kanalında ayrıca videoreportaj yerləşdirib. Reportajda Qarabağda baş verən dağıntılar öz əksini tapıb. Tanınmış bloger Azərbaycan Ordusunun 44 günlük müharibə zamanı göstərdiyi qəhrəmanlıqdan, eləcə də Qarabağın mədəniyyətindən bəhs edib.
Xəbərdən istifadə edərkən istinad etmək vacibdir.
