Dünyada milyonlarla izləyicisi olan məşhur "Sürətli və hiddətli" filmlərinin yeddinci hissəsinin çəkilişləri ərəfəsində baş rol ifaçılarından olan Paul Uolkerin vaxtsız ölümü rejissorları bir müddət çətin vəziyyətdə qoymuşdu.

Hətta filmin yaradıcıları filmi ya yarımçıq saxlamaq ya da məzmununu tamamilə dəyişmək barədə düşünürdülər. Lakin, yol qəzasında dünyasını dəyişən aktyorun qardaşları Kodi və Kalebin, eləcə də kompüter-şəkilləndirmə metodunun (Computer-Generated İmagery)  köməyilə filmin qalan hissəsini tamamlamaq mümkün olub. Belə ki, xüsusi işıqlandırma yöntəmləri və kamera obyektivlərinin bucaqlandırma metodları ilə Paul Uolkerin qardaşları onun rolunu ifa ediblər. Bəzi məqamlarda isə Uolkerin siması kompüter vasitəsilə canlandırılıb. P.Uolkerin rəqəmsal kompüter obrazını yaratmaq vəzifəsini isə Yeni Zelandiyanın "WETA Digital" şirkəti üzərinə götürüb.

Bildirək ki, bu şirkət Holivudun məşhur "Üzüklərin rəhbəri" filmindəki Qollum, "Meymunlar planetinin çöküşü" filmindəki Sezar obrazlarını da kompüter effektlərilə canlandırıb.  (interaztv.com)