Birinin yaşadığı şəhərə atom bombası düşdü, biri velosiped sürərkən avtomobillə toqquşdu, tankın altında qaldı, digəri isə təyyarə havada olarkən yerə yıxıldı... Lakin "Necə də şanssız insanlardı” deməyə tələsməyin. Çünki onlar başlarına gələn bütün bu hadisələrdən burnu belə qanamadan xilas olmağı bacarıblar. Elə bu sujetimizdə də sizi dünyanın ən şanslı insanlarının bir neçəsi ilə tanış edəcəyik.
İki atom bombardmanından sağ çıxan adam. Söhbət Yaponiya vətəndaşı Tsutomi Yamaquçidən gedir. Tsutomi 1945-ci il avqustun 6-ı iş üçün Xirosimaya getmişdi. Şəhərə ayaq basar-basmaq ABŞ hərbi hava qüvvələri atom bombası attı. Dəhşətli partlayışdan kiçik xəsarətlərlə qurtulan Tsutomi bir gün sonra yaşadığı Naqasaki şəhərinə qayıdır. Amma faciə onu izləyirdi. Xirosimada baş verən hadisələri dostlarına danışdığı vaxt ABŞ hərbi hava qüvvələri Naqasakiyə də atom bombası atır. Nə qədər qəribə olsa da Tsutomi on minlərlə insanın öldüyü bu dəhşətli hadisədən də sağ çıxır. Dünya tarixinə iki atom bombasından sağ çıxan şəxs kimi adını yazdıran Tsutomi Yamaquçi 2010-cu ildə 93 yaşında mədə xərçəngindən vəfat edib.
Əslində Alec Alderi keçirdiyi qəzaların sayına görə dünyanın ən şanssız adamı adlandırmaq olardı. Lakin onun bu qəzalardan kiçik yaralarla qurtulması, dünyanın ən şanslı adamı adını qazanmasına səbəb olub. 1926-cı ildə üzərinə aşan ağacdan xilas olan Aleki üç il sonra velosiped sürərkən maşın vurub. Lakin sürücünün həkim olması və anındaca ilkin müdaxiləsi onu ölümün pəncəsindən xilas edib. Əsgərliyə yollanan Aleci burda da ölüm addım-addım izləyib. Bu dəfə o təlim zamanı tankın altında qalmışdı. Amma yenə bəxti gətirir və torpağın palçıqlı olması onu ölümün pəncəsindən alır.
Dünyanın ən məşhur şanslı insanı isə təbii Xorvatiyalı Frane Selakdır. 50 il əvvəl Zaqrebdən Dubrovnikə gedərkən Frane ağlına belə gətirməzdi ki, bütün dünya onu tanıyacaq. Təbii ki, Frane heç nə kəşf etməmişdi. Onun sərnişini olduğu qatar relsdən çıxaraq buz bağlamış çaya aşmışdı. 17 yolçunu udan çaydan yalnız Xorvatiyalı musiqi müəllimi Frane Selak üzərək çıxa bilmişdi. Amma Franenin başına gələnlər bununla bitmədi. Ağılasığmaz görünsə də bu dəfə Franenin uçduğu təyyarənin qapısı açılmışdı və sərnişinlər göyərtədən çölə tökülmüşdü. Frane Selak da təyyarədən çölə uçanlar arasında idi. Amma 19 nəfərin öldüyü hadisə zamanı yenə Frane sağ qaldı. Həm də ot tayasının üstünə düşərək. 1966-cı ildə isə onun mindiyi avtobus yoldan çıxaraq çaya yuvarlandı. Qəzada dörd adam həyatını itirdi. Selak isə yüngül xəsarətlərlə xilas oldu. Sonralar yanan avtomobildən sağ çıxan Franeni hətta avtobus da vurur. Canını kiçik sıyrıqlarla qurtaran Franenin bəxti təkcə üzləşdiyi qəzalar zamanı gətirməyib. 2003-cü ildə həyatında ilk dəfə lotereya bileti alan Frane Selak 1 milyon dollarlıq cekpotu udaraq bir daha dünyanın diqqətini çəkdi. (atv.az)
Xəbərdən istifadə edərkən istinad etmək vacibdir.
