Sumqayıt bulvarı hazır olmasına baxmayaraq, artıq isti yay günlərində insanlar buraya axışır. Ailələr, dost çevrələri, həmkarlar Sumqayıtın bu gözəl hissəsindən indidən yararlanmağa başlayır. Sumqayıt sakinlərinin istəyinə uyğun olaraq qısa müddət ərzində ümumi sahəsi 106 hektar, uzunluğu 4,2 kilometr olan ərazidə bulvarın inşasına başlanıldı. Hazırda bulvarda 4,2 kilometr uzunluğunda istinad divarı çəkilib və bulvarın 1000 metrlik hissəsində işlər tamamlanmaq üzrədir. Gənclər şəhəri üçün böyük əhəmiyyət daşıyan bulvarda şəhər sakinlərinin piyada gəzintisi, kiçikölçülü gəzinti avtobusları və avtomobil yolu ilə yanaşı velosiped idmanı ilə məşğul olmaq istəyənlər üçün də eni üç metr olan xüsusi hərəkət zolağı salınır. Bununla yanaşı bulvarda istirahət obyektləri, attraksionlar, ticarət və uşaqlar üçün əyləncə mərkəzləri, müasir tipli otellər, kinoklub, idman infrastrukturu və çoxmərtəbəli yaşayış binaları inşa ediləcək, çimərlik zonasında da əsaslı işlər görülərək sakinlərin istifadəsinə veriləcək. Sahil hissədə estakadalar qurulacaq və şəhərin akvatoriyasında gəzinti gəmilərinin hərəkəti təmin olunacaq. Hazırda Sumqayıt sakinləri bulvarın bütövlükdə tikilib hazır olduğu günü səbrsizliklə gözləyir.

Onlar inanır ki, bulvar şəhərin simasını tamamilə dəyişəcək.