Separatçı kürdlərin siyasi cinahı olan Xalqların Demokratiyası Partiyasının (HDP) həmsədri Səlahəddin Demirtaşın səsləndirdiyi müqayisə müsəlmanları hiddətləndirib. Demirtaş ötən gün 1977-ci ildə 1 may günü Taksim meydanında öldürülən fəhlələrin anım tədbirində iştirak edib. Taksim meydanının kommunistlər üçün önəmindən danışan siyasi liderin dilə gətirdiyi bənzətmə inanc sahibləri tərəfindən xoş qarşılanmayıb. Demirtaş, xahiş edirəm göstərəcəyim nümunə mübaliğəli qarşılanmasın deyərək müqəddəs Kəbə ilə Taksim meydanını müqayisə edib: 
"Göstərəcəyim nümunə mübaliğəli qarşılanmasın. Müsəlmanlar hacı olmaq üçün Kəbəyə gedirlər. musəvilər Qüdsə gedərlər. dini inancların mərkəzi var, məbədləri var. O ibadətləri başqa heç bir yerdə edə bilməzsiniz. Bəli, dini inanc baxımından dini inanc kimi demirəm. Amma Taksim də zəhmətkeşlər üçün əvəz olunmaz yerdir. Orda bayram keçirilməsə, həmin il 1 may qeyd olunmamış sayılır, 1 may "şəhidləri” anılmamış sayılır. Taksimi yasaqlamaq 1 mayı yasaqlamaqdır. Xüsusilə bu seçki ərəfəsində baş nazirə müraciət edirəm. Gəlin bu 1 mayda heç bir gərginlik olmadan zəhmətkeşlər bayramı bayram kimi qeyd etsinlər. anım gününü də 1977-ci il 1 mayın xatirəsinə uyğun həyata keçirsinlər. biz də siyasətçilər olaraq zəhmətkeşlərimizin, fəhlələrimizin yanında yer alaq”.  (anspress.com)