Kristina Kiler... bu fotodakı gözəl qadın çətin ki, hansısa kişini cəlb etməsin. Fəqət bu da var ki, ona vurulacaq hər bir kişini heç də xoşbəxtlik gözləmir. İndi 70 yaşında olan bu gözəlçə malikanəsində tək-tənha yaşayır; kim bilir, bəlkə də nostaljiyə qapılıb, keçmişin xiffətini çəkir, ötən əsrdə yaşadığı rəngarəng, həyəcanlı ömrü kino lenti kimi gözləri qarşısında canlanır, ixtiyarlıq depressiyası da öz yerində. Axı bu "gözəllik kamikadzesi”ni daha sevən yoxdur?!
Kristina canlı tarixdir. Həmin tarix ki, bu qızcığaz "soyuq müharibə” illərində sovet kəşfiyyatçısı ilə britaniyalı naziri "barmağına dolamağı” bacarmışdı. Böyük Britaniyanın müdafiə naziri Con Profyumo və sovet kəşfiyyatçısı Yevqeni İvanovla eyni vaxtda sevgi yaşayan bu qadının toruna düşənlərin müqəddəratı fransız dahi riyaziyyatçının sözlərini xatırladır.
Cəmi 20 il, 6 ay yaşamış Evarist Qalua dueldə sevgisi uğrunda ölərkən son sözləri Kristinin tələsinə düşənlər üçün leytmotivdir: "Məni günahkar bilməyin ki, vətən uğrunda yox, iki ağılsızı toruna salmış tərbiyəsiz, işvəli bir qadının qurbanına çevrilərək ölürəm. Belə bir əhəmiyyətsiz iş ucbatından ölməyimə təəssüflənir, göyləri şahidliyə səsləyirəm”.
Belə bir axmaq, emosional, hisslərinə qurban gedən nazir kimə lazımdır?! Bu, London elitası, Britaniya kimi siyasətin "beyin mərkəzi” olan dövlətin adına rüsvayçılıq idi. Eləcə İvanovun da tora düşməsi sovet kəşfiyyatına ciddi xətalardan sayıla bilər. Əslində, "soyuq müharibə” illərində sovet kəşfiyyatı Qərbin gözəl qadınlarından tez-tez öz mənfəəti üçün ustalıqla istifadə edib. Kristina nümunəsində isə vəziyyət fərqlidir...
...Hər şey 16 yaşlı qızcığazın pritondan aparılması ilə başlayır.
Buna qədər Londondan aralıda vaqonda yaşayan Kristina "ev”dən getməli olur. Anasının təzə əri ona məşuqə gözü ilə baxdığı üçün ailəni tərk edir. Amma bir zənci tərəfindən təcavüzə məruz qalır. Sonrası da bəlli - Londonun gecə barlarından birində işə düzəlir, müştəriləri əyləndirməyə başlayır.
Amma günün birində bara təşrif buyuran londonlu həkim Stiven Uord olmasaydı, bu qızcığaz bəlkə də elə gecə klubunda yaşlanacaq, ya da xəstələnib öləcəkdi. Həkimin niyyəti nanəcib və çirkin idi. O, qızı vəzifə adamlarına təklif etməklə, yüksək təbəqə arasında nüfuz qazanacağını güman edirdi. Beləcə, qızı iqamətgahına aparır.
Malikanədə vəzifəli adamlarla tanışlıq başlanır. Və məclislərin birində - Böyük Britaniyanın müdafiə naziri Con Profyumo hovuzda çimirmiş. Uord Kristinaya ona yaxınlaşmağı işarə edir. Nazir ona heyran olur, dəlicəsinə aşiq olur.
Di gəl, nazirin yatsa yuxusuna da girməzdi ki, sevgilisi SSRİ-nin hərbi-dəniz attaşesi Yevgeni İvanova məxfi məlumatlar ötürür. İngilis kəşfiyyatı bu məsələdən agah olanda artıq gec idi. Kristinanın İvanovla görüşlərinin şəkilləri nazirin qabağına qoyulur, onun nəinki hərbi-attaşe, KQB əməkdaşı olduğu müəyyənləşir.
Bəs, Kristina ilə İvanovun sevgisi nələrə gətirib? Arxiv materiallarında qeyd olunur ki, İvanov Kristinaya elə o dərəcə aşiq idi ki, Kremldən gələn təlimatları yerinə yetirməyi belə unudur, gecələr səfirliyin avtomobilini qorxmadan evinə sürürdü.
Nəticə hər iki tərəf üçün bədbin sonluqla başa çatdı. İngilis nazir bu biabırçı səhvinə görə işindən qovuldu, sovet diplomatı Moskvaya çağırıldı. İvanovun həyat yoldaşı isə onu atıb getdi.
Sabiq KQB əməkdaşı üçün depressiv dövrə başlandı, içkiyə qurşandı.
Kristina və İvanov yalnız 1993-cü ildə, sovet hökuməti dağılandan sonra Moskvada görüşdülər. Bu, onların son görüşü idi. Bir il sonra İvanov dünyasını dəyişdi. Həkim Uordu da tələyə salan və ona işləməyə məcbur edən İvanov imiş.
Profyumo isə 2006-cı ildə vəfat edib. Kristinaya gəlincə, gözəlliyi ilə qalan dövrü də imkanlı kişilərlə keçirdi. Bu kişilərdən olan 2 oğlundan biri ondan üz döndərdi. Kristina isə memuarlar yazaraq böyük qonorarlar əldə etdi.
Bu gün də "soyuq müharibə” davam edir. Ukrayna böhranı üzərindən Rusiya-Qərb savaşı dərinləşməkdədir. Ancaq günümüzün Kristinası və İvanovu kimdir, onu gələcək göstərəcək.
...İndi 70 yaşında olan bu gözəlçə malikanəsində tək-tənha yaşayır; kim bilir, bəlkə də nostaljiyə qapılıb, keçmişin xiffətini çəkir, ötən əsrdə yaşadığı möcüzəvi taleyi kino lenti kimi gözləri qarşısında canlanır, yaşlılığın depressiyası da öz yerində. Axı bu "gözəllik kamikadzesi”ni daha sevən yoxdur?! (axar.az)
