Fransada ölən adamın qoxusunu xatırladan ətir istehsal edilməyə başlanılıb.
Katya Apalatequ adlı bir fransız yaxınlarının ölümünü qəbul edə bilməyən və qoxuları üçün darıxan insanlara ölən adamın qoxusunu xatırladan ətir istehsal etməyə başlayıb.

52 yaşlı Apalatequ atasının ölümündən sonra fotoşəkil və video materiallar ilə ona olan həsrətinə son qoya bilməyib və atasının qoxusunu yenidən hiss edə bilmək üçün illərcə çalışıb. Çoxlu sərgilər gəzən, araşdırmalar aparan və ətriyyatçılarla görüşən Katya Apalatequ "Qala" adlı firma quraraq ölü qoxusundan ətir istehsal etməyə başlayıb.

Ətir üçün ölən adamın paltarlarındakı molekullar müxtəlif kimyəvi əməliyyatlardan keçirilərək köçürülür, ayrılır və nəhayət, spirt içərisində saxlanılaraq ətir halına gətirilir.

Apalatequ işləyən analar üçün körpələrinin qoxusunu və ya heyvansevərlər üçün çox sevdikləri heyvanların qoxusunu da ətir olaraq çıxarmağa hazırlaşdığını bildirib.

Bu ətirin qiyməti isə 560 avrodan başlayır.

Qeyd edək ki, ölən şəxslərin qoxusunu ətirə çevirmək fikri Patrik Züskindin "Əttar" romanını xatırladır. Romanda qatilin öldürdüyü qızların qoxusunu toplaması öz əksini tapır.  (axar.az)