1959-cu ilin fevralında bir qrup turist Şimali Uralda yerləşən Ölülər dağı mənasını verən XOLATÇAXLDA düşərgə salır. Bir neçə gün sonra qrupun bütün üzvlərinin cəsədi tapılır. Araşdırmalar aparılsa da, faciənin nə səbəbdən baş verdiyini aydınlaşdırmaq mümkün olmur. Kimi turistlərin ildırım vurması nəticəsində öldüyünü, kimi bunun yadplanetlilərin işi olduğunu dedi. Lakin irəli sürülən fərziyyələrin heç biri təsdiqini tapmadı və baş verən faciə tarixə sirri açılmayan hadisə kimi daxil oldu.
Dünyanın ən qorxulu məkanlarından biri də, Yaponiyadakı Aokigahara meşəsidir. Bu meşəyə gələn 500-dən çox insanın naməlum şəraitdə yoxa çıxması və onlar haqqında heç bir məlumatın alınmaması, meşənin ən qorxulu və təhlükəli məkan adı alması ilə nəticələnib. "Ölüm meşəsi”olaraq tanınan məkanın hər yerində "zibil atmayın”, "təmizliyə riayət edin” tipli elanlar əvəzinə "özünüzün və yaxınlarınızın həyatını təhlükəyə atmayın” kimi xəbərdarlıq elanları yazılıb. Lakin bütün bunlara baxmayaraq Aokigahara meşəsinə gələn turistlərin sayı günü-gündən artmaqdadır.
Paranormal hadisələrin həvəskarı olanlar çox güman ki London qülləsi haqda da məlumatlıdırlar. Qüllə bir zamanlar Böyük Britaniya krallığının dövlət həbsxanası olub. Elə bu dövrlərdə məkanda yüzlərlə dustaq öldürülüb, edam edilib. İnsanların inancına görə, hazırda həmin insanların ruhları qüllənin pilləkənlərində gəzişir. Hətta bəzən ruhların qışqırtısını eşitdiklərini iddia edənlərə belə rast gəlmək mümkündür. Təbii ki, qüllə haqqında bu cür əfsanələr, rəvayətlər kifayət qədər olsa da, bunların həqiqətə nə dərəcədə uyğun olub-olmadığını demək çətindir. (atv.az)
