Yay fəslinin əbədi-əzəli mövzularındadır. Günəşin hərarəti 38 dərəcəni keçdisə, dərhal biz jurnalistlər üçün də bu mövzu aktuallıq qazanır: məşhurlar harda istirahət edir? Müğənnilərdən başlayıb, şair-yazıçılara, aktyorlara və ən nəhayət, prezidentlərə qədər gedib çıxırıq. Biz kasıblar ilin cəmi 10 gününü özümüzə istirahət üçün rəva biliriksə, onlar nə edirlər? Seçimləri, zövqləri, istirahət məkanları... haradır? Ailəvi istirahətə nə qədər xərcləyirlər? Və ən əsası xalq buna nə deyir? 

Rusiyanın "Komsomolskaya pravda” qəzeti və euromaq.ru saytı bu il də ölkə prezidentlərinin istirahəti ilə bağlı maraqlı bir araşdırma hazırlayıb. Araşdırmada prezidentlərin daha çox istirahətə ailələri ilə birgə getdiyi yazılsa da, istisnalar ümumi qaydanı pozmur. Beləcə, planetin ən məşhur turistləri ilə bağlı son durumdan danışaq.

ABŞ prezidenti Barak Obama vəzifəyə gəldiyi gündən etibarən Martas Vinyard adasında, "Sinyaya saplya” adlanan yerdə istirahət edir. Hər yay cəmi 10 gün məzuniyyət götürən prezident bu günlərini ailəsi və yaxınları ilə keçirir. Sözügedən məkan Massaçusets ştatından 7 km aralıdadır. Ağ Evin rəsmi təmsilçisi Ceyn Karni jurnalistlərə deyir ki, cənab Obamanın məzuniyyəti də simvolik xarakter daşıyır. Çünki o, istirahət zamanı işlərini yarıda kəsmir, yazır, Ağ Evlə əlaqə saxlayır. "The Washington Post" qəzeti isə yazıb ki, Obama ailəsinin qaldığı evin həftəlik kirayəsi 50 min dollardır. Obama bu pulu öz cibindən ödəyir. Bu rayondakı evlərin orta qiyməti isə 650 min dollardır. 

Amma Obama prezident olmazdan əvvəl də ailəsi ilə keyfiyyətli istirahət qrafiki qururmuş. Hələ 2008-ci ildə B.Obama Havay adalarını seçibmiş. Maraqlı detal odur ki, bəzən Obama ailəsi yay istirahətini ayrı-ayrılıqda qurur. Məsələn, prezidentin 49 yaşı tamam olan il ailə üzvlərindən heç biri yanında olmamışdı. Belə ki, onun böyük qızı Maliya yay düşərgəsində idi, kiçik qızı Saşa isə anası Mişellə birlikdə İspaniyaya uçmuşdu. Bu il isə Obama ailəsi yay istirahətini avqustun sonuna salıb. Onlar bu il də vədlərinə xilaf çıxmadan Martas Vinyardda istirahət edəcəklər. Onların sevimli məkanlarında məşhur ərəb şeyxləri ilə yanaşı, Şon Konneri və Antonio Banderas kimi aktyorlar da istirahət edib.

ABŞ prezidenti Barak Obamanın ailəsi ilə birlikdə istirahət etdiyi yay iqamətgahı satışa çıxarılıb. Villanın satış qiyməti 22,5 milyon dollardır.

 

 

Nəhəng villa prezident ailəsinin yay istirahəti üçün 2013-cü ildən icarəyə götürmüşdü.  Birləşmiş Ştatlar prezidenti bu villanı icarəyə götürərkən onu diqqətini çəkən ətrafındakı gözəl mənzərə olub. Ev Massaçusets ştatında yerləşən Martas-Vinyard adasındakı Çilmark şəhərində, səs-küydən uzaq bir yerdə yerləşir. 

Satışa çıxarılmış bu ev 900 kvadratmetr sahəyə malikdir və dəniz səviyyəsindən 36 metr hündürlükdə yerləşir. Böyük pəncərələrdən görünüş isə birbaşa Atlantik okeanına açılır. 

2006-cı ildə tikilmiş evin sahəsi 600 kvadratmetr təşkil edir. Onun başlıca üstünlüyü şəxsi çimərliyə malik olmasıdır. 

Atlantik okeanının sahilində şəxsi çimərlikdən başqa, kiçik körpü, qapalı hovuz, idman zalı, tennis kortu, basketbol meydançası və əlbəttə ki, avtomobillər üçün park yeri var.

Evdə altı yataq, altı vanna otağı, olduqca böyük mətbəx və zal var.

BİRİ LÜKSÜ SEVİR, O BİRİ QƏNAƏTİ 

İspaniya kralı Xuan Karlos da istirahətini ailə üzvləri ilə keçirməyi sevənlər kateqoriyasına daxildir. Onu yay istirahəti zamanı həyat yoldaşı Sofiya, oğlu Felip, eləcə də nəvələri müşayiət edir. Onların istirahət üçün seçdiyi məkanlar sırasında Balear adalarını xüsusi vurğulamaq lazımdır. Bu, heç də Malyorkadan uzaq sayılmaz. İspan qəzetlərinin proqnozuna görə, hətta istirahət sırasında Mişel Obama da onlara qonaq gedə bilər. 

Dəniz romantikasını Britaniya şahzadəsi 2-ci Yelizaveta da sevir. Məsələn, 2006-cı ildə, öz 80 illik yubileyində Yelizaveta özünə Şotlandiyanın cənub sahillərində bir kruiz hədiyyə edib. Ondan sonra belə səfər hər il təkrarlanıb. Əsl Britaniya aristokratı kimi Yelizaveta da şıq, təmiz məkanlarda istirahət etməyi sevir. Şəxsi köməkçisi onun istirahətlə bağlı bütün arzularını detallarına qədər həll edir.

 

 

Almaniyanın kansleri Angela Merkel isə istirahət məsələsində də sistemliliyin və daimiliyin tərəfdarıdır. O, artıq illərdir Cənubi Tirola istirahətə gedir. Çox rahatdır- guya ki, xarici ölkə sayılır, İtaliyadır. Amma yerli əhali alman dilində danışır. İstirahətdən əvvəl Merkel Vaqnerov festivalına da baş çəkir. Məlum olduğu kimi, onun həyat yoldaşı, professor Yoxaim Zauer operanı çox sevir. Ailə istirahət üçün çox rahar, üstəlik o qədər də baha olmayan bir oteli seçir. Həmin oteldə otağın bir gecəsi 57-89 avro məbləğindədir. Otelin balkonundan isə dağları seyr etmək mümkündür. Alman qəzetləri yazır ki, Merkel ötən il istirahətə gedəndə özü ilə İosif Stalinin 900 səhifəlik avtobioqrafik kitabını götürüb. Amma Almaniyanın yeni prezidenti Kristian Vulf kanslerdən fərqli olaraq tənhalığı sevmir. Prezident və onun 38 yaşlı xanımı tez-tez jurnalistlərin obyektivinə tuş gəlirlər.

FRANSANIN KEÇMİŞ VƏ YENİ PREZİDENTLƏRİ – İSTİRAHƏTDƏ VƏTƏNPƏRVƏRLİK... 

Fransanın keçmiş prezidenti Nikola Sarkozinin yay tətili isə Fransa mətbuatında çox da müzakirə edilən mövzulardan olmayıb. Çünki illər boyu tətilini ölkə xaricində keçirən Sarkozi son illər həyat yoldaşı Karla Bruni Faraqinin Sent Tropdan bir qədər uzaqlıqda yerləşən villasında keçirib. Sarkozi özəl kaprizləri, xüsusi istəkləri olan birisi kimi tanınmadığı üçün onun yay məzuniyyəti də hər hansı maraqlı olaylarla yadda qalmayıb. Amma o, prezident olduğu dönəmdə hər il üç həftəlik istirahət götürürdü.

 

 

Istirahət və əyləncələrinə xüsusi diqqət yetirən fransızların hazırkı lideri Fransua Ollandi istirahət üçün Fransadan kənara çıxmayıb. Prezident Fort de Breqansonda, dəniz sahilində istirahət etməyi qərara alıb.

İLDƏ DÖRD DƏFƏ MƏZUNİYYƏT – XALQ QƏZƏBLƏNİB 

Böyük Britaniyanın baş naziri Devid Kameron bu ilki yay tətilində öz ailəsi ilə Portuqaliyaya gedib. Doğrudur, səfərindən bir gün  sonra Kameron bir tədbirdə iştirak etmək üçün geri qayıdıb, amma sonra tətil davam edib. 

Böyük Britaniya baş nazirinin ailəsi sakit dəniz istirahətini sevir. Onların sevimli məkanı İspaniya və İngiltərə sahilləridir. Keçən il Kameron il ərzində dörd dəfə istirahət etməyə fürsət tapıb: Portuqaliyada, Kornoul qraflığında, Şotlandıya və Fransada. Məhz bu fakt britaniyalıları çox qəzəbləndirmişdi. Onlar hətta ildə bir dəfə məzuniyyət üçün pul yığmağın çətin olduğunu düşünərək,  baş nazirin ildə 4 dəfə özünə belə bir lüks yaşatmasının sual doğurduğunu deyirdilər. 

Türkiyənin keçmiş prezidenti Abdulla Gül isə yay istirahətini iyul ayında keçirməyi tərcih edir. O, adətən Antalyadakı yaxınlarına baş çəkir, bağda meyvə toplayır. Ağ dəniz sahillərini gəmi ilə gəzən Gül istirahətini ailəsi ilə birgə edir. Gül yerli mətbuata açıqlamasında deyir ki, onun istirahət üçün hansısa xarici ölkəni seçməsi absurd olar. Çünki bütün dünya Türkiyəni turizm cənnəti bilir. 

YAYDA MÜALİCƏ İLƏ MƏŞĞUL OLANLAR VƏ BİZİ QICIQLANDIRANLAR 

Qalmaqallar kralı Silvio Berluskoniyə gəlincə, heç də gənc olmayan bu şəxs artıq neçənci ildir ki, yayda ancaq öz müalicəsi ilə məşğul olur. Son illər o, Milandan çox da uzaqda olmayan villasında sağlam həyat tərzi keçirir - gimnastika, dieta, hidroterapiya. 

 

 

Rusiyalı baş nazir-prezident cütlüyü olan Putinlə Medvedyevin istirahəti də hər zaman medianın diqqətində olub. Onların hər ikisi yay istirahətini Soçidə keçirməyi tərcih edir. Amma bu arada işlərini də yaddan çıxarmırlar, əyləncələrini də. Bəzən birgə hansısa futbol matçına baxan cütlük daha sonra istirahət etdikləri məkanda parlament partiyalarının liderləri ilə görüşlər keçirirlər.