Haşiyə: Ramella Qeysər qızı Novruzova 1983-cü ilin noyabrın 2-də Qusar rayonunda anadan olub. 2000-ci ildə Qusar rayonu 5 saylı tam orta məktəbi bitirərək Sumqayıt şəhər Tibb Kollecinin Müalicə işi fakültəsinə qəbul olub və 2003-cü ildə oranı bitirib. Əmək fəaliyyətinə Qusar rayonu "OKİ" Özəl Tibb müəssisəsində fizioterapevt olaraq başlayıb. 2010-2012-ci ildə Bakı şəhərində fəaliyyət göstərən "ABU Klinika”nın vertobralogiya şöbəsində işləyib. 2017-ci ildə "Fizioterapiyada innovasiya texnologiyaları”adlı təlimdə iştirak edərək sertifikatla təltif olunub. 2015-ci ildə "Bioloji Təbabət Klinikası”nın fizioterapiya şöbəsində təcrübə keçib və bu müddət ərzində orada olan müayinələr və fizioterapiyanın yeni avadanlıqları ilə tanış olub. Həmin ildən etibarən "Yaşa Sağlamlıq Mərkəzi”nin reabilitasiya şöbəsində fəaliyyət göstərir.

- Ramella həkim, ilk olaraq reabilitasiya haqqında məlumat verərdiniz. Reabilitasiyanın məqsədi nədir?

- Reabilitasiya insanın anadangəlmə və ya sonradan hər hansı bir səbəbdən meydana çıxan qalıcı və ya keçici çatışmazlıqlarının müalicə edilməsi, günlük yaşamında sərbəst hərəkət vəziyyətinə gəlməsini təmin etməkdir. Əsas məqsəd xəstəyə düzgün fizioterapiya və reabilitasiya proqramı tərtib edərək müalicəni həyata keçirməkdir.

- Bəs fizioterapiya ilə reabilitasiyanın fərqi nədir?

- Reabilitasiyada biz müalicəvi idman vasitəsilə hərəkəti bərpa edirik. Amma fizioterapiyada bunu sırf avadanlıqlar ilə həyata keçiririk.

- Hansı xəstəliklərin müalicəsində reabilitasiya tətbiq olunur?

- Serebral iflic (DSP), insult xəstəlikləri, skolioz və kifozun ağır formalarında, uşaqlarda əzələ boşluğu yarandıqda və s. kimi hallar baş verdiyi zaman reabilitasiya tətbiq olunur. Əzələ boşluğu olan uşaqlarda əzələlərin bərkidilməsi üçün xüsusi aparatlardan istifadə olunur. Bu xəstəliklər zamanı reabilitasiya ilə yanaşı, xəstəyə fizioterapiya müalicə üsulu da tətbiq olunmalıdır.

- Ən uzunmüddətli reabilitasiya tələb edən əməliyyat hansıdır?

- Reablitasiyanı ən uzunmüddətli şəkildə biz skolioz, uşaqlarda serebral iflic (DSP), kifozun ağır forması, insult xəstəliklərinin müalicəsində həyata keçiririk.

- Uşaqlarda skolioz xəstəliyinin olduğunu necə müəyyən etmək mümkündür?

- Bədənimizin bel və kürək hissəsində yaş irəlilədikcə bir çox problemlər yaşana bilər. Skolioz kimi bəzi narahatlıqlar uşaq yaşlarından etibarən görülə bilir. Yetkinlik yaşında və ondan əvvəl bədəndə sürətli dəyişikliklər meydana gəlir. Bu xəstəlik zamanı uşağın bir çiyin və ya bud-çanaq oynağı digərindən yuxarıda yerləşir. Önə doğru əyildikdə bu əlamətlər daha çox nəzərə çarpır, qabırğa donqarlığı əmələ gəlir, bir qol digərindən daha uzun görünür, çiyinlər fərqlənir. Uşaqlarda bu, bədən quruluşlarına görə tipik olaraq daha gizli şəkildə özünü göstərir. Çəkisi çox olan uşaqlarda kənardan dəyişiklik kiçik şəkildə özünü biruzə verir. Buna görə də, valideynlər uşaqlarında baş verən dəyişiklikləri hiss etməyə də bilərlər. Əgər valideynlər uşaqlarında skoliozun olması ilə bağlı narahatlıq keçirirlərsə, mütləq həkimə müraciət etməlidirlər. Skolioz xəstəliyinə hazırda uşaqların çoxunda, təxminən hər 10 uşaqdan 7-sində rast gəlinir. Uşaqlara daha aktiv həyat tərzi yaşamağı, müntəzəm şəkildə idmanla məşğul olmağı məsləhət görürəm.

- Reabilitasiyanın faydaları nələrdir?

- Ümumiyyətlə idmanın çox şeyə faydası var və demək olar ki, idman problemi olana da, olmayana da lazımdır. Ən çox da əzələlərin bərpası üçün biz reabilitasiyaya müraciət edirik. Qol sındıqdan sonra uzun müddət gipsdə qaldığı zaman onda kontraktura yaranır. Belə vəziyyətdəki xəstəyə mütləq reabilitasiya tətbiq olunmalıdır.

- Son olaraq nə demək istəyirsiniz?

- Son olaraq valideynlərə demək istəyirəm ki, daha çox diqqətli olsunlar və uşaqlarına daim nəzarət etsinlər. Uşaqlarının sağlamlığı ilə əlaqədar şübhəli bir məqam olduğu təqdirdə həkimə müraciət etsinlər.

Elnarə Salamova

Xeberle.com