Jandarma binasına 2 ton bomba ilə yüklənmiş traktorla intihar hücumu edilib

 PKK terror təşkilatı Türkiyədə daha bir terror aktı həyata keçirib. APA-nın Türkiyənin "Milliyet” qəzetinə istinadən verdiyi məlumata görə, Ağrı vilayətinin Doğubəyazit rayonuna aid Qarabulaq Jandarma binasına 2 ton bomba ilə yüklənmiş traktorla intihar hücumu edilib. Nəticədə 2 təhlükəsizlik əməkdaşı şəhid olub, 24-ü yaralanıb. Valiliyin açıqlamasında bildirilir ki, PKK-nın xain hücumu yerli vaxtla saat 3.00-da baş verib. Yaralılar Doğubəyazit Dövlət Xəstəxanasına yerləşdirilib. Avqustun 2-nə keçən gecə Mardində isə 1 əsgər şəhid olub, 4-ü yaralanıb. Bir qrup PKK terrorçusu tərəfindən Gəlinkaya bölgəsindən keçən neft borusuna hücum olub. Əraziyə göndərilən təhlükəsizlik qüvvələrinin hərəkəti zamanı mina partlayışı baş verib. Nəticədə bir əsgər şəhid olub. Ərazidəki PPK-çıların ələ keçirilməsi üçün keçirilən əməliyyat zamanı isə terrorçularla atışmada 4 əsgər yaralanıb.