Türkiyənin Şırnaq vilayətində kürdlərin terrorçu PKK təşkilatına qarşı əməliyyatda şəhid olmuş polis əməkdaşı, 23 yaşlı Osman Belkaya dəfn olunub.
Xeberle.com AHT-yə istinadən bildirir ki, şəhid polis doğulduğu məkanda, Yozqatın Şefaaltı rayonunda torpağa verilib.
Şefaaltıdakı Cumhuriyyət Meydanındakı Çarşı Məscidindəki dəfn mərasiminə Türkiyə prezidenti Rəcəb Tayyib Ərdoğan, nazirlər, dövlət rəsmiləri və millət vəkilləri ilə bahəm, 5 min nəfər qatılmışdı.
Şəhidin Türkiyə bayrağına sarılmış tabunu məscidin qarşısına çıxarılanda onun atası Yakub Belkaya oğlunun fotosunu tutaraq tabutunun qarşısında gedib. Şəhid anası Afet göz yaşları içində deyib: "Məni şəhid anası etdin. Son dəfə gələndə "Sizə sürprizim var" deyirdin. Bu idimi sürprizin sənin, bala?! Sənə doya bilmədim, verə bilmərəm səni qara torpağa". Oğlunun tabunun qucaqlayan ana hıçqıraraq söyləyib: "Oğlum üşüyür, balama soyuqdur. Məni də onun yanına qoyun... Nə olar, yalvarıram sizə... Ona sarılar, isidərəm balamı..."
4 övlad atası, polis zabiti Yakup Belkaya "Oğul, ürəyi yandırıb gedirsən, oğul!" deyərək nalə çəkib.
Şəhidin bacısı Kafiye polis paltarı geyinmişdi və o, qardaşının tabutuna sarılıb. Digər bacılar Serap və İrem də az sonra Kafiyeye qatılıblar.
Şəhidin babası Abdulla Onar tabutun yanında sayğı növbəsində durmuş polisin kövrələrək ağladığıın görəndə yerindən durub, ona yaxınlaşıb və polisin göz yaşlarını silərək söyləyib: "Ağlama, oğul, düşməni sevindirmə. Biz qürurluyuq..."