Qazaxıstanda kimin prezident olması Azərbaycan üçün də vacibdir.
Xeberle.com xəbər verir ki, bu fikirləri Oxu.Az-a açıqlamasında azərbaycanlı politoloq Elxan Şahinoğlu deyib.
Onun sözlərinə görə, Azərbaycan hakimiyyətinin və cəmiyyətinin Nursultan Nazarbayevə simpatiyası var:
"Çünki Nazarbayev Azərbaycanın ərazi bütövlüyünü birmənalı dəstəkləyir. Təsadüfi deyil ki, Ermənistan Avrasiya İqtisadi İttifaqına qoşularkən Nazarbayev demişdi ki, Qarabağ mallarının ümumi bazara buraxılmasının əleyhinədir. Yerevanda yaxşı anlayırlar ki, Qarabağda müharibə başlasa, Kollektiv Təhlükəsizlik Müqaviləsi Təşkilatında Ermənistanın sözdə müttəfiqi sayılan Astana heç bir halda Azərbaycana qarşı siyasət yürütməyəcək, Ermənistana hərbi dəstək verməyəcək”.
Politoloq əlavə edib ki, Nazarbayev Azərbaycanla iqtisadi-ticarət əməkdaşlığını da genişləndirir.
"Ona görə Azərbaycan Qazaxıstanın gələcək prezidentinin də Nazarbayevin siyasi kursunu davam etdirməsini istəyir. Nazarbayev elə bir varis seçməlidir ki, yeni prezident onun siyasətini davam etdirsin. Bu məqsədlə Nazarbayev son illər hakimiyyətdə xeyli yerdəyişmələr edib, gəncləri irəli çəkib. Qazaxıstanda müxalifət zəifdir. Ona görə də Qazaxıstanda gələcək prezident Nazarbayevin müəyyənləşdirəcəyi siyasətçi olacaq”, - Elxan Şahinoğlu bildirib.
O qeyd edib ki, Qazaxıstanda prezidentliyə bir neçə namizəd var:
"Bunlardan biri Parlament Senatının sədri Kasım Jomart Tokayev və prezidentin qızı Dariqa Nazarbayevadır. Nazarbavev kimə üstünlük verdiyini büruzə vermir. Bunun səbəbi var. Nazarbayev öz namizədini vaxtından əvvəl bildirsə, bu hakimiyyət daxilində gərəksiz mübarizənin və qruplaşmaların yaranmasına səbəb olacaq.
Bu isə daxildə və xaricdə son dərəcə ehtiyatlı siyasət yürüdən Qazaxıstan hakimiyyəti üçün ciddi problemlər yarada bilər. Qazaxıstanda prezident seçkisi 2020-ci ildə keçiriləcək. Ona görə Nursultan Nazarbayevin düşünməsi üçün hələ iki il vaxt var”.
Siyasi şərhçi Nursultan Nazarbayevin siyasətinin balanslı olduğuna diqqət çəkib.
"Onun siyasəti həm ölkə daxilində, həm də ölkə xaricində müsbət qarşılanır. Nursultan Nazarbayev həm Rusiyanın strateji müttəfiqidir, həm də Qərblə yaxşı münasibətləri var. Ancaq bu, o demək deyil ki, Nazarbayev Moskvanın bütün istək və tələblərini yerinə yetirir”, - ekspert bildirib.
O deyib ki, Nursultan Nazabayev son illər milli maraqlara uyğun siyasətini gücləndirib:
"Qazaxıstanda latın əlifbası tətbiq edildi, kitablar və bədii əsərlər Qazax dilinə tərcümə edilir. Qazax dilinin inkişafı üçün yeni layihələr reallaşdırılır”.
Politoloq ABŞ-ın da Qazaxıstanla əlaqələrə əhəmiyyət verdiyini qeyd edib.
"ABŞ prezidenti Donald Tramp ilin əvvəlində Nursultan Nazarbayevi Ağ Evə dəvət etdi. Vaşinqtonda iki ölkə arasındakı münasibətləri inkişaf etdirmək üçün sazişlər imzalandı. Nazarbayevin müxtəlif dövlətlərlə qurduğu sıx münasibətlər üçüncü dövlətlərə qarşı yönəlməyib.
Bu faktor həm Rusiyanı, həm ABŞ-ı, həm Avropanı, həm də ərəb dünyasını razı salır. Ancaq Nazarbayev yaşlanıb və o varisi haqqında düşünmək məcburiyyətindədir. Gələcək varisin kimliyi Qazaxıstanla sıx münasibətləri olan bütün dövlətləri maraqlandırır”, - Elxan Şahinoğlu əlavə edib.
Xəbərdən istifadə edərkən istinad etmək vacibdir.
