Ukraynada Luqnask vilayətində gedən döyüşlərin birində silahlı qüvvələrin tankı separatçılar tərəfindən mühasirəyə alınıb. 

APA TV-nin məlumatına görə, tankın ekipajı T-64 zirehli texnikanı separatçılara təslim etməməkdən ötrü özlərini tankın içərisində qumbara ilə partladıblar. Hadisənin təfərrüatları barədə danışan şahidlər bildiriblər ki, separatçılar öncə tankın tırtıllarını snayperdən açılan atəşlə qırıblar. Tankın ekipaj üzvləri ağacların arasından iki nəfərin əlində qumbaraatanla yaxınlaşdığını görüb. Lakin atəş açmayıblar. Çünki, ətrafda yalnız yaşayış evlər olub. Bütün bunlara baxmayaraq separatçılar tankın arxa hissəsindən qumbaraatanla atəş açıblar. Zirehli texnika qismən yarasız hala salınsa da ekipaj təslim olmamağı qərara alıb. Bu zaman tankın içərisindən partlayış səsləri gəlib. Daha sonra tank içəridən yanmağa başlayıb. Bəzi mətbuat orqanlarında tankın komandiri və onun köməkçisinin çıxıb təslim olması ilə bağlı xəbərlərin yayılmasına gəlincə, hadisə şahidləri belə bir hadisənin baş vermədiyini, tankın ekipaj üzvlərinin qəhrəmanlıqla həlak olduqlarını bildiriblər.