Prezident Petr Poroşenko Baş qərargah rəisi Viktor Mujenkoya separatçılardan geri alınan Slavyansk şəhərinin əsas dövlət qurumlarının binası üzərində Ukraynanın Dövlət Bayrağının qaldırılması tapşırığını verib.

 AzNews.az Ukrayna mediasına istinadən xəbər verir ki, bu barədə Ukrayna prezidenti Petr Poroşenko öz “facebook” səhifəsində yazıb.

Məlumatda bildirilib ki, Baş qərargah rəisi Viktor Mujenko Slavyanskın separatçılardan geri alınmasına dair xəbəri prezidentə məruzə etdikdən sonra P. Poroşenko ona belə əmr verib.

 Xəbərdə o da qeyd olunub ki, hazırda Slavyanskda Ukrayna Silahlı Qüvvələrinin bölmələri kəşfiyyat-təmizləmə əməliyyatını həyata keçirir: “Yerli sakinlər terrorçulardan qalan silahlar haqda hərbçiləri məlumatlandırır, yaxudda gətirərək, təhvil verirlər”.

 Xatırladaq ki, Ukraynanın şərqində son aylar separatçı-terrorçu qruplaşmaların əsas dayaq nöqtəsinə çevrilmiş və “alınmaz qala” adlandırılan Donetsk vilayətinin Slayvansk şəhəri nəhayət ki, azad edilib. Ukrayna ordusunun Slavyansk ətrafındakı bütün strateji nöqtələri ələ keçirməsi və son olaraq şəhərə bitişik Nikolayevka qəsəbəsini ağır döyüşlərdən sonra azad etməsindən sonra separatçılar və Rusiyadan gəlmiş muzdlular Slavyansk şəhərini tərk etməyə qərar veriblər. Onlar iyulun 5-nə keçən gecə Slavyanskdan çıxaraq Kramatorsk şəhəri istiqamətində Ukrayna ordusu və Milli Qvardiyasının mühasirəsini yarıblar.

 Ukraynanın daxili işlər naziri Arsen Avakov da son durumla bağlı açıqlama verib. O bildirib ki, Slavyanskdakı silahlıların lideri, “Donetsk Xalq Respublikası”nın “müdafiə naziri”, Rusiya vətəndaşı, “Strelkov” ləqəbli İqor Qirkin qaçıb.

 Qeyd edək ki, 120 min nəfər əhalisi olan Slavyansk şəhəri aprelin 12-dən bəri separatçıların nəzarətində idi.