Rusiyanın bir çox millət vəkilləri kimi Krımda səfərdə olan Rusiya Dövlət Dumasının beynəlxalq əlaqələr komitəsinin sədri Aleksey Puşkov Ukrayna ilə müharibə təhlükəsindən danışıb. İnterAz-ın Rusiya KİV-lərinə istinadən verdiyi xəbərə görə, hakim “Vahid Rusiya” partiyasından olan deputatın fikrincə, hadisələrin məhz bu cür inkişafı tam mümkündür, ona görə də Rusiya olduqca ehtiyatlı davranmalıdır.

“Rusiya Ukrayna ilə müharibənin bir addımlığındadır”, -  deyə Rusiya Ukrayna tərəfindən ərazisinin atəşə tutulmasına niyə reaksiya vermədiyi barədə sualı cavablandırarkən Puşkov bildirib.

Deputat hesab edir ki, əgər müharibə başlasa, bu münaqişə uzana bilər, çünki Ukraynaya ABŞ və Avropa Birliyi dəstək verəcək və bu əslində onların planlarına daxildir. “Təyyarələrimizin Ukrayna hava məkanına nəzarəti elə həmin müharibənin başlanmasına səbəb ola bilər”, - deyə o qeyd edib.

Parlamentari onu da əlavə edib ki, Rusiya ərazisinin guya separatçılar tərəfindən atəşə tutulması yalandır. “Rəsmi Kiyevin bu barədə bütün bəyanatlarının heç bir əsası yoxdur. Biz Ukrayna tərəfini sərt cavab tədbirləri barədə xəbərdar etmişik. Hələ reaksiya yoxdur”, - deyə Puşkov bildirib.

Müharibə ehtimalının artması haqqında Polşanın baş naziri Donald Tusk da açıqlama verib. Rusiyanın humanitar konvoyunun Ukraynaya göndərilməsinə gəlincə isə Qərb rəsmiləri bunu bir bəhanə kimi dəyərləndirərək müharibəyə səbəb kimi anlayırlar. Qeyd edək ki, rəsmi kiyevin və Qırmızı Xaç cəmiyyətinin etirazlarına baxmayaraq, Rusiyanın 270 KaMAZ-dan ibarət humanitar yardımı Ukraynaya əvvəl razılaşdırıldığı kimi Xarkov vilayətindən deyil, Ukrayna ordusu ilə silahlı mübarizə aparan yerli yaraqlıların nəzarət etdiyi Luqansk vilayətindən, “İzvarino” məntəqəsindən daxil olacaq.

ABŞ ekspertləri əmindirlər ki, Putin humanitar yardımı bəhanə edib mütləq Ukraynaya hərbi müdaxilə edəcək və özünün hərəkətlərini ABŞ-ın dinc əhalinin “İslam dövləti” yaraqlılarından qorunması missiyası ilə İraqa müdaxiləsi ilə müqayisə edəcək.