Türkmənistanın indiki prezidenti Qurbanqulu Berdımuhəmmədov Orta Asiya ölkələri arasında “qara at” hesab olunur. Onun şəxsi həyatı gizli saxlanılır. Heç kəs cürət edib bu haqda nə danışa bilər, nə də yerli mətbuatda bu haqda cürət edib yazmaq mümkündür. Bu səbəbdən prezidentin ailəsi barədə müxtəlif məlumatlar dolaşmaqdadır. Modern.az saytının müxtəlif mənbələrə istinadən apardığı araşdırmanı təqdim edir. 

Bəzi mənbələrin iddiasına görə, Qurbanqulu Berdımuhəmmədov iki dəfə evlənib. Onun türkmən qızı ilə evləndiyi birinci nikahından artıq böyük oğlu olduğu bildirilir. İndiki həyat yoldaşı, belə demək mümkünsə, Türkmənistanın birinci ledisi hesab olunan milliyyətcə rus Marinadan isə yeniyetmə yaşlarında olan bir qızı var. Digər məlumata görə, Türkmənistanın dövlət başçısının bir oğlu, üç qızı və dörd nəvəsi var.

Yeddi bacının tək qardaşı 

Analitiklərin fikrincə, Berdımuhəmmədov postsovet məkanında ən qapalı olan Türkmənistanı ciddi şəkildə dəyişib. Onun prezidentliyi dövründə Türkmənistanda o qədər də böyük olmayan və daha çox Koreya Xalq Demokratik Respublikasındakına bənzəyən yenidənqurma addımları atılıb. Qızıl heykəllər yığışdırılıb, keçmiş dövlət başçısı Saparmurad Niyazovun pensiyadan tam imtina qərarına yenidən baxılıb, olduqca qəribə olan 9 illik orta təhsil sistemi ləğv olunub və eləcə də ali təhsil sistemində dəyişikliklər baş verib. Niyazovun “Ruhnamə” kitabının məcburən oxumaq qaydasına son qoyulub, ölkənin xarici aləmdən təcrid olunması dayandırılıb. İnternet-kafelər açılıb. Mətbuatda isə Saparmurat Niyazovun ölümünə az qalmış şayiələr yayılmağa başlamışdı ki, guya Qurbanqulu Türkmənbaşının nikahdan kənar oğludur. Ancaq bunu köklü sübut edəcək fakt yoxdur. 

Berdımuhəmmədov 8 uşağı olan ailənin yeganə oğlu olub. Ondan balaca bacılarından biri Türkmənistan Milli İqtisadiyyat Universitetində müəllimdir, ən balaca bacısı isə evdar qadındır. O, ölkənin Mərkəzi Bankının əməkdaşı ilə evlidir. 
Prezidentdən böyük olan ikinci bacısı Aynabat qardaşının xidməti vəziyyətindən fəal şəkildə sui-istifadə edir. 

Türkmənistan sarayının gizlinləri

Qeyd etdiyimiz kimi, Türkmənistan prezidenti Qurbanqulu Berdımuhəmmədovun ailəsi haqda çox az şey məlumdur. Ancaq onun nəvəsi Kərimqulunun adı mediada daha çox çəkilir. Televiziyada nümayiş olunan videoçarxlarda o, prezident babası ilə yanaşı və əlindən möhkəm yapışmış halda  görünüb. Nəvə Kərimqulu prezident ailəsinin üzvlərinin hamısından fərqli olaraq daim dövlət KİV-nin diqqətindədir. 

Kərimqulu 2012-ci ilin fevral ayında ilk dəfə media qarşısında peyda olanda babasını seçki məntəqəsində müşayiət edib. O vaxtdan bəri babanın sevimli nəvəsi dəfələrlə Türkmənistandakı kütləvi tədbirlərdə görünüb. 2013-cü il iyunun 29-da Kərimqulu Türkmənistan prezidentinin anadan olmasının 56 illiyinə həsr olunan və Xəzər dənizinin sahilindəki Avaza kurortunda möhtəşəm bayram tədbirində pianinoda ifa edib. Həmin bayram şənliyinin əsas qonağı isə dünyanın hazırda ulduz müğənnilərindən biri sayılan Cenifer Lopez olub. Ənənəvi türkmən kostyumu geyinən və sadəcə Kərimqulu Berdımuhəmmədov kimi təqdim olunan nəvə digər musiqiçilər və müğənnilərlə birgə Türkmənistan odasını və Arxadağı (bu Qurbanqulu Berdımuhəmmədova verilən titullardan biridir) ifa edib.

“Sənin gecələrin gözəldir. Hər şey parıldayır. Biz səninlə qürur duyuruq. Bizim sevimli Vətənimiz. Sən bizim Arxadağımızla elə gözəl olmusan ki...”. 
Mahnıda belə deyilir.

Berdımuhəmmədovun ailəsi haqda bundan başqa hər şey gizli saxlanılır. Hətta Kərimqulu haqda da bundan başqa məlumat əldə etmək mümkün deyil. Onun valideynləri haqda da heç nə bəlli deyil. 

ABŞ-ın Aşqabaddakı səfirliyindəki mənbənin 2009-cu ildəki məlumatına görə, Qurbanqulu Berdımuhəmmədov və onun həyat yoldaşının iki qızı və Sərdar adında bir oğlu var. Sərdarın Moskva Dövlət Universitetinin beynəlxalq münasibətlər fakültəsinin məzunu olduğu və bir zaman Türkmənistanın Xarici İşlər Nazirliyində işlədiyi bildirilir. Deyilənə görə, prezidentin böyük qızı Gülcahan İxlasgəldi Amanovla evlidir, mənzil-qərargahı Londonda yerləşən təbii ehtiyatların idarə edilməsi və istifadəsi üzrə Türkmənistan dövlət agentliyində işləyir. 

ABŞ-ın Aşqabaddakı səfirliyindəki mənbənin 2009-cu ildə verdiyi digər məlumata görə, bu cütlüyün 2009-cu ildə anadan olan Aynagözəl adında qızı, 9 yaşında İsmayıl adlı oğlu var. Həmin məlumatda qeyd edilir ki, Qurbanqulu Berdımuhəmmədovun ikinci qızı 2009-cu ildə Parisdə yaşayıb, o vaxt əri orada Türkmənistan səfirliyində işləyirmiş. Yerli türkmən iş adamı iddia edir ki, bu qızın Fransanın cənubundakı Lazur sahilində villası da var.

Diplomatik qaynaqlar iddia edir ki, Qurbanqulunun uzun illərdir Marina adlı rus əsilli sevgilisi var. Xəbərlərdə bildirilir ki, o Berdımuhəmmədovun karyerasını başladığı stomatoloji klinikada tibb bacısı işləyir və prezidentin həmin xanımdan 17-18 yaşlarında olan bir qızı dünyaya gəlib.

Aşqabad sakinləri arasında isə belə söz-söhbət dolaşır ki, Berdımuhəmmədovun türkmən arvadı ilə yanaşı, sevgilisi və var və çox mühafizəkardır. Onların iddiasına görə, prezidentin sevgilisi Marina adlı etnik rusdur. Berdımuhəmmədovun arvadının isə 2007-ci ildən Londonda yaşadığı vurğulanır.